Bugun, 22-iyun kuni Toshkent viloyatining Piskent tumanida joylashgan avtomobil ehtiyot qismlari do‘konida yong‘in sodir bo‘ldi. Bu haqda Favqulodda vaziyatlar vazirligi ma’lum qildi. Vazirlik xabariga ko‘ra, soat 09:35 da Toshkent viloyati Favqulodda vaziyatlar boshqarmasiga Piskent tumani “Oybek” mahalla fuqarolar yig‘inida joylashgan avtomobil ehtiyot qismlari do‘konida yong‘in yuzaga kelgani haqida xabar kelib tushgan.

Shunga ko‘ra, yong‘in-qutqaruv ekipajlari voqea joyiga soat 09:45 da yetib borgan. Yong‘in soat 09:48 da qurshab olinib, soat 10:14 da to‘liq bartaraf etilgan. Ma’lum qilinishicha, tezkor harakatlar natijasida binoning 300 kvadrat metr maydoni yong‘indan saqlab qolingan. Dastlabki ma’lumotlarga ko‘ra, hodisa oqibatida jabrlanganlar yo‘q. Hozirda yong‘inning kelib chiqish sabablari hamda yetkazilgan moddiy zarar miqdori aniqlanmoqda.