Avvalroq 25-dekabrda qabul qilingan O‘RQ–1108-sonli qonun bilan ayrim qonun hujjatlariga o‘zgartirish va qo‘shimchalar kiritilib, soliq munosabatlarida biznes uchun bir qator yengilliklar belgilangani haqida xabar berilgandi.

2026-yil 1-yanvardan boshlab ushbu tartib kuchga kirib, soliq hisobotini o‘z vaqtida taqdim etmaganlik uchun qo‘llaniladigan ma’muriy jarimalar miqdori kamaydi. Yangi tartib soliq to‘lovchilar uchun ma’muriy yuklamani kamaytirishga qaratilgan.

Qabul qilingan o‘zgarishlarga muvofiq, endilikda fuqarolar uchun soliq hisobotini kech topshirganlik jarimasi 3 BHMdan 1 BHMga tushirildi. Kichik tadbirkorlik subyektlarining mansabdor shaxslari uchun esa jarima miqdori 10 BHMdan 3 BHMga qisqartirildi. Bu tadbirkorlik faoliyatini qo‘llab-quvvatlashga qaratilgan muhim qadam sifatida baholanmoqda.

Yangi tartibda yana bir muhim o‘zgarish nazarda tutildi. Agar tadbirkor hisobot davrida bir nechta soliq turlari bo‘yicha hisobotlarni taqdim etmagan bo‘lsa, barcha taqdim etilmagan hisobotlar uchun faqat bitta ma’muriy jarima qo‘llaniladi. Ilgari esa har bir soliq hisoboti bo‘yicha alohida jarima belgilanar edi.

Shuningdek, so‘nggi uch oy davomida soliq hisobotlarini o‘z vaqtida taqdim etib kelgan tadbirkorlik subyektlariga qo‘shimcha imtiyoz berilmoqda. Unga ko‘ra, bunday tadbirkorlar soliq hisobotini 5 kungacha kechiktirib topshirgan taqdirda, ularga ma’muriy jarima qo‘llanilmaydi.

• Hisobot
• Jarima
• Qaror
• Soliq