Xitoy janubidagi Guansi provinsiyasida kuchli suv toshqinlari oqibatida ilon fermasidan qariyb 900 ta ilon qochib ketdi. Bu haqda The Guardian xabar berdi. Ma’lum qilinishicha, “Maysak” tayfuni sabab yuzaga kelgan kuchli yog‘ingarchilik Xenchjou shahridagi Liulan suv ombori to‘g‘onining yorilishiga olib kelgan. Oqibatda hududni suv bosib, mahalliy ilon fermasi vayron bo‘lgan.

Dengvey qishlog‘i qo‘mitasi raisi U Chjinning so‘zlariga ko‘ra, dastlabki hisob-kitoblarga binoan, fermadan 800–900 ta ilon, jumladan zaharli kobralar, qirol kalamush ilonlari va suv ilonlari qochib ketgan. Ijtimoiy tarmoqlarda tarqalgan videolarda ilonlarning suv bosgan uylar va ko‘chalar atrofida suzib yurgani aks etgan.

Ayrim mahalliy OAVlarga ko‘ra, Yunbyao qishlog‘ida yashovchi bir ayol ilon chaqishi oqibatida vafot etgan. Shuningdek, mahalliy shifoxonalar ilon zahariga qarshi zardob zaxirasini ko‘paytirgan. Mutaxassislar eng katta xavf zaharli kobralardan ekanini ta’kidladi. Shu bilan birga, ular uzoq vaqt suv ostida qolgan ilonlarning katta qismi nobud bo‘lishi mumkinligini ham qayd etdi.