TikTok AQSH hukumatiga bolalarning shaxsiy ma’lumotlarini himoya qilish talablarini buzgani haqidagi ishni yakunlash uchun 400 million dollar to‘lashga rozi bo‘ldi. Bu bolalar maxfiyligi bilan bog‘liq AQSHdagi eng yirik kelishuvlardan biri hisoblanadi. Bu haqda BBC xabar berdi.

Kelishuv AQSH Adliya vazirligining 2024-yilda TikTok va uning bosh kompaniyasi ByteDance’ga qarshi kiritgan da’vosi bilan bog‘liq. Unda kompaniyalar 13 yoshdan kichik bo‘lgan millionlab foydalanuvchilarning “katta miqdordagi” shaxsiy ma’lumotlarini to‘plagani va shu orqali 2000-yilda qabul qilingan Bolalar onlayn maxfiyligini himoya qilish to‘g‘risidagi qonun (COPPA) talablarini buzganlikda ayblangan.

Kelishuvga ko‘ra, TikTok va ByteDance AQSH Adliya vazirligiga 300 million dollar to‘laydi. Qolgan 100 million dollar esa AQSH Federal Savdo komissiyasi bilan 2019-yilda tuzilgan kelishuv bekor qilinganidan so‘ng to‘lanishi kerak.

Bu TikTok’ning bolalar maxfiyligi bilan bog‘liq ilk muammosi emas. Kompaniyaning avvalgi nomi Musical.ly 2019-yilda COPPA talablarini buzganlikda ayblanib, 5,7 million dollar jarimaga tortilgan. O‘shanda kompaniyaga 13 yoshdan kichik foydalanuvchilar uchun ota-onalarning roziligini olish talabi qo‘yilgan.

AQSH hukumati 2024-yilda sudga murojaat qilganida, TikTok’dan 170 milliondan ortiq amerikalik o‘smir foydalanishini ma’lum qilgan. Da’voda platforma bolalarni faol jalb qilayotgani, biroq foydalanuvchilarning yoshini samarali aniqlash va voyaga yetmaganlar uchun ota-ona roziligini olish mexanizmlari yetarli emasligi ta’kidlangan.

Da’vo kiritilganidan buyon TikTok egalik tuzilmasi, maxfiylik siyosati va yosh foydalanuvchilarni himoya qilish mexanizmlarini sezilarli darajada o‘zgartirgan.

Qayd etilishicha, mazkur kelishuv TikTok’ning Xitoydagi operatsiyalariga taalluqli. Kompaniyaning AQSHdagi biznesi esa o‘tgan yili alohida tuzilmaga ajratilgan. Hozir uning 81 foizi investorlar konsorsiumiga, 19 foizi esa ByteDance’ga tegishli.

Eslatib o‘tamiz, avvalroq AQSHning Nyu-Meksiko shtati sudi Meta kompaniyasini o‘smirlarning ruhiy salomatligiga zarar yetkazganlikda aybdor deb topgani haqida xabar berilgan edi. Sud kompaniyaga 567 million dollar tovon puli to‘lash va Facebook hamda Instagram’da voyaga yetmaganlar xavfsizligini kuchaytirish majburiyatini yuklagan.