Namangan viloyatining Pop tumanida fuqarolarga gaz tarmog‘ini tortib berish va tegishli ruxsatnomalarni rasmiylashtirishda yordam berishni va’da qilib, katta miqdorda pul talab qilgan ikki shaxs ushlandi.

Ma’lum qilinishicha, “Pop tumangaz” operatori N.R. hamda avval sudlangan P.Z. ikki fuqaroning xonadoniga tabiiy gaz tarmog‘ini tortib berish va zarur hujjatlarni rasmiylashtirishni va’da qilgan. Buning evaziga ular jami 2 100 AQSH dollari so‘ragan.

Shaxslar kelishilgan mablag‘ning dastlabki 200 dollarini olgan. Qolgan 1 900 dollarni olayotgan vaqtida esa huquqni muhofaza qiluvchi organlar tomonidan ashyoviy dalillar bilan qo‘lga olingan.

Dastlab berilgan 200 dollar ham qaytarilgan va bu holat belgilangan tartibda hujjatlashtirilgan.

Mazkur holat yuzasidan Jinoyat kodeksining 168-moddasi, ya’ni firibgarlik alomatlari bilan jinoyat ishi qo‘zg‘atilgan. Hozirda tergov harakatlari davom etmoqda.

Huquqni muhofaza qiluvchi organlar ish doirasida voqeaning barcha tafsilotlarini o‘rganmoqda.