Ozarbayjon Prezidenti Ilhom Aliyev O‘zbekistonning so‘nggi yillardagi taraqqiyoti va Prezident Shavkat Mirziyoyev rahbarligida amalga oshirilgan islohotlarga yuqori baho berdi.

U Shavkat Mirziyoyev O‘zbekiston rahbarligiga kelgan davrdagi vaziyat bilan bugungi holat o‘rtasida katta farq borligini ta’kidladi.

“Shavkat Miromonovich O‘zbekistonga rahbarlik qilishni boshlaganida vaziyat butunlay boshqacha edi. Buni O‘zbekiston fuqarolari ham, biz ham juda yaxshi bilamiz. Shu sababli u mamlakatni rivojlanish yo‘liga qo‘yish hamda davlatning iqtisodiy jihatlarini noldan shakllantirish uchun katta kuch bilan ishlashiga to‘g‘ri keldi”, — dedi Ilhom Aliyev.

Ozarbayjon rahbari O‘zbekistonda sanoat va qishloq xo‘jaligini rivojlantirish, energetika va transport infratuzilmasini modernizatsiya qilish, shuningdek, xorijiy investitsiyalarni jalb etish borasida amalga oshirilayotgan ishlarga ham to‘xtaldi.

“Bugun biz butunlay boshqacha O‘zbekistonni ko‘rib turibmiz — jahon hamjamiyatining juda hurmatga sazovor a’zosiga aylangan O‘zbekistonni. Sanoatni rivojlantirish, qishloq xo‘jaligi, energetika, transport infratuzilmasi bilan bog‘liq masalalar juda tezkor va samarali hal etilmoqda”, — dedi u.

Ilhom Aliyevning ta’kidlashicha, O‘zbekistonda amalga oshirilgan islohotlar ikki davlat o‘rtasidagi hamkorlik loyihalarini rivojlantirish uchun ham muhim zamin yaratgan.

“Shavkat Mirziyoyev va uning jamoasi tomonidan O‘zbekiston uchun qilingan ishlar va bu islohotlar bo‘lmaganida, birorta ham hamkorlik loyihasini amalga oshirishning imkoni bo‘lmasdi”, — dedi Ozarbayjon Prezidenti.

Uning qayd etishicha, Shavkat Mirziyoyev O‘zbekiston rahbarligiga kelguniga qadar ikki mamlakat o‘rtasida birorta ham qo‘shma loyiha mavjud bo‘lmagan.

Ayni paytda O‘zbekiston va Ozarbayjon o‘zaro tovar aylanmasini 1 milliard dollarga yetkazishni maqsad qilgan. Ilhom Aliyev bu ko‘rsatkichni uzoq muddatli maqsad emas, balki yaqin ikki yilda amalga oshirilishi mumkin bo‘lgan natija sifatida baholadi.

“Bugun biz 1 milliardlik tovar aylanmasi haqida gaplashyapmiz. Bu qandaydir uzoq muddatli orzu emas, yaqin ikki yilda amalga oshadigan ishdir”, — dedi u.

Ozarbayjon rahbari, shuningdek, ikki mamlakat iqtisodiyoti ehtiyoj sezayotgan sohalarda yangi investitsiya loyihalari va o‘zaro sarmoyalarni oshirish masalalari muhokama qilinganini aytdi.

Uning fikricha, bu kabi hamkorlik O‘zbekiston va Ozarbayjon iqtisodiyotining parallel ravishda rivojlanishi hamda ikki davlatda amalga oshirilayotgan islohotlar natijasida yuzaga kelmoqda.