Prezidentning tashqi siyosat masalalari bo‘yicha maxsus vakili A.X.Kamilov boshchiligidagi delegatsiyaning Afg‘onistonga 2022-yil 19-iyun kuni amalga oshirilgan tashrifi natijalari bo‘yicha maʼlumotlar Afg‘oniston mahalliy axborot vositalari orqali zudlik bilan yoritib borilyapti.

Mahaliy OAV, jumladan, Komilovning Afg‘oniston ichki ishlar vaziri v.b. Sirojiddin Xaqqoniy bilan uchrashuvi haqida ham yozmoqda.

Sirojiddin Xaqqoniy uchrashuv avvalida Komilovni ilgari O‘zbekiston Tashqi ishlar vaziri lavozimida Afg‘oniston uchun o‘ynagan ijobiy roli uchun minnatdorchilik bildirdi. Shuningdek, u A.Komilovni yangi lavozimga tayinlangani bilan tabriklab, uning kelgusidagi ishlarida muvaffaqiyat tiladi.

Uchrashuv davomida Afg‘onistondagi xavfsizlik masalalari muhokama qilindi va tomonlar iqtisodiy imkoniyatlardan foydalanishi uchun xavfsizlik taʼminlanishi zarurligini taʼkidladilar.

Komilov Ichki ishlar vazirini Termiz–Mazori-Sharif–Kobul temir yo‘li loyihasini amalga oshirishda xavfsizlikka alohida eʼtibor qaratishga chaqirdi. Uning taʼkidlashicha, ushbu temir yo‘l loyihasi mintaqa va Afg‘onistonning iqtisodiy farovonligida muhim rol o‘ynashi mumkin.

Haqqoniy Afg‘oniston va O‘zbekiston o‘rtasidagi do‘stlik va qardoshlik munosabatlarini yuqori baholadi va Afg‘oniston havfsizlik kuchlari barcha milliy loyihalar, ayniqsa, O‘zbekiston tomonidan amalga oshirilayotgan temir yo‘l va elektr tarmoqlari qurilishi loyihalariga eʼtibor qaratishiga ishontirdi.

Mamlakat IIV vaziri qo‘shimcha qilib, Afg‘onistonda erishilgan g‘alabadan so‘ng Islom Amirligi mamlakatda tinchlikni o‘rnata olganini taʼkidlab, qo‘shni davlatlar uchun chegaralarda xavfsizlikni taʼminlash masalasi alohida ahamiyatga ega ekanligiga urg‘u berib o‘tdi.

Suhbat yakunida tomonlar mamlakatlar iqtisodiy imkoniyatlaridan samarali foydalanishi uchun ikki davlat yanada yaqinroq ishlashiga harakat qilishiga vaʼda berdi.

• Abdulaziz Kamilov
• Afg‘oniston
• IIV
• O‘zbekiston