O‘zbekiston, Afg‘oniston va Pokiston o‘rtasida transport-logistika sohasidagi hamkorlikni rivojlantirish masalalari bo‘yicha Termiz shahrida bo‘lib o‘tgan uch tomonlama ishchi guruh uchrashuvida tashuvchilar va xususiy sektor vakillari o‘rtasida hamkorlikni yo‘lga qo‘yish yuzasidan B2B/G2G uchrashuvlari o‘tkazildi.

Transport vazirligi Matbuot xizmati bergan maʼlumotga ko‘ra, mazkur uchrashuvlar yakunida Pokiston va Afg‘onistonning 7 ta kompaniyasi bilan o‘zaro  hamkorlik to‘g‘risida memorandum va kelishuvlar imzolandi. 

Shuningdek, tadbir ishtirokchilari “Termiz Cargo Centre” xalqaro logistika markazi hamda “Ayritom” chegara-bojxona postida tashqi iqtisodiy faoliyat qatnashchilariga eksport-import operatsiyalarini amalga oshirishda yaratilgan shart-sharoitlar bilan yaqindan tinishishdi.

Qayd etilishicha, uch tomonlama saʼy-harakatlar natijasida Pokistondan Afg‘oniston orqali O‘zbekistonga avtomobil transportida xalqaro yuk tashuvlarini tashkil etish bo‘yicha olib borilayotgan ishlar samarasi o‘laroq, bugun ushbu transport koridorining to‘laqonli faoliyat yuritishi, yuklarning qisqa fursatlarda, xavfsiz ravishda belgilangan manziliga yetkazilishi taʼminlanmoqda.

Vazirlikning taʼkilashicha, ayni paytda milliy tashuvchilar ham ushbu koridordan foydalanishni boshlashgan.

Joriy yil 27-mart kuni mazkur tadbirlar doirasida Pokistondan yuk olib kelayotgan milliy yuk tashuvchilarimizning transport vositasi tantanali ravishda kutib olindi.

• Afg‘oniston
• Logistika
• Pokiston
• Transport