Konservativlar partiyasi rahbari va Buyuk Britaniya Bosh vaziri lavozimiga nomzod tashqi ishlar vaziri Liz Trass Shotlandiya mustaqilligi bo‘yicha yangi referendumga keskin qarshi chiqdi. Agar u hukumat boshlig‘i lavozimiga saylansa, Shotlandiya aholisi uchun bunday erkinliklar kutilmaydi. Bu haqda u “The Daily Telegraph” nashriga bergan interviyusida aytib o‘tdi.

“Shotlandiya xalqi referendum avlodda bir marta o‘tkaziladigan imkoniyat ekanligiga rozi bo‘lishdi. Agar men Britaniya Bosh vaziri bo‘lsam, ularni bu so‘zlarida turishga majbur qilaman. Bu Shotlandiya va Buyuk Britaniya uchun nodemokratikdir. Istagan natijalarga erishmaguningizcha, so‘rovnoma o‘tkaza olmaysiz. Mustaqillik haqidagi har qanday referendum parlament tomonidan ruxsat etilishi kerak. Agar men Bosh vazir bo‘lsam, bunday vakolatlarni bermayman. Bosh vazir sifatida ittifoqimizni himoya qilish uchun zarur va to‘g‘ri bo‘lgan ishni qilaman. Huddi Shimoliy Irlandiya protokoli boʻyicha qilganimdek... Mening rahbarligim davrida Shotlandiya mustaqilligi boʻyicha ikkinchi referendum oʻtkazilmasligiga mutlaqo aminman”, — deydi Trass.

Trassning qo‘shimcha qilishicha, mamlakat inqiroz davrida turibdi, shuning uchun Shotlandiya Milliy partiyasi Shotlandiya xalqini ta’minlash va noto‘g‘ri ishlarni tuzatishga e’tibor qaratishi kerak.

“Bosh vazir sifatida men ularni javobgarlikka tortaman. Ular endi Shotlandiya xalqining ehtiyojlarini o‘zlari e’tiborsiz qoldirib, buning uchun Vestminsterni ayblasholmaydi. Shuningdek, bu harakatlarni mustaqillikka bo‘lgan ehtiyoj bilan bog‘lay olishmaydi”,– deydi u.

Ma’lumot uchun, Shotlandiya mustaqilligi bo‘yicha referendum 2014-yilda bo‘lib o‘tgan edi. Uning ishtirokchilarining 55 foizi London bilan ittifoqni saqlab qolish tarafdori edi. Biroq, Sturgeon vakili bo‘lgan Shotlandiya milliy partiyasi so‘nggi yillarda Buyuk Britaniyaning Yevropa Ittifoqini tark etganligi sababli, ikkinchi ovoz berish zarurligini ta’kidlamoqda. Joriy yilning 28-iyun kuni Shotlandiya birinchi vaziri Nikola Sturjyon 2023-yil 19-oktabrda mintaqaning Birlashgan Qirollikdan ajralib chiqishi bo‘yicha referendum o‘tkazishni taklif qildi. Edinburgdagi mintaqaviy parlamentda so‘zlagan nutqida u bu masala Buyuk Britaniya Oliy sudi ko‘rib chiqilishini aytdi.

• Liz Trass
• Referendum\
• Shotlandiya
• ozodlik