Qozog‘istonning birinchi prezidenti Nursulton Nazarboyev 23-avgust kuni Qurultoy deputatlari saylovida uyidan turib ovoz berdi. Yaqinda jarrohlik amaliyotini boshdan kechirgan sobiq prezidentning uyiga ko‘chma saylov qutisi olib borilgan.

Nazarboyevning matbuot xizmati uning sog‘lig‘i sababli shaxsan saylov uchastkasiga bora olmaganini ma’lum qildi. Sobiq davlat rahbari qonunda belgilangan tartibda o‘z saylov huquqidan uyida foydalangan.

E’lon qilingan fotosuratda Nazarboyev Qozog‘iston davlat gerbi tasvirlangan ko‘chma saylov qutisiga byulleten tashlayotgani aks etgan. 86 yoshli Nazarboyevning sochlari to‘liq oqarib ketgani va avvalgiga qaraganda ancha keksaygan ko‘rinishda ekani seziladi.

So‘nggi yillarda Nursulton Nazarboyev jamoat va siyosiy tadbirlarda kamdan-kam ko‘rinmoqda. Shunga qaramay, u yangi bir palatali Qurultoyni shakllantirish bo‘yicha o‘tkazilgan saylovda o‘z ovozini berdi.