Kanada Bosh vaziri Mark Karni uy-joy siyosatiga bag‘ishlangan matbuot anjumanida telesuflyor ishlamay qolganidan so‘ng AQSH Prezidenti Donald Trampga kinoyali izoh berdi. Voqea davomida u vaziyatni hazil bilan qabul qilib, nutqini to‘xtatmasdan davom ettirdi.

“Telesuflyor ishlashdan to‘xtadi. Ayrim dunyo yetakchilaridan farqli o‘laroq, men buni fitna deb hisoblamayman”, deya ta’kidladi Karni. Uning bu so‘zlari Trampning o‘tgan yili BMT Bosh Assambleyasidagi chiqishi vaqtida telesuflyor nosozligi yuz bergach, bu holat bo‘yicha tekshiruv talab qilganiga kinoya sifatida baholandi.

Hozircha Karni ma’muriyati ham, Oq uy ham ushbu bayonot yuzasidan rasmiy izoh bermagan.

So‘nggi yillarda Kanada va AQSH o‘rtasidagi munosabatlar keskinlashgan. Donald Tramp Kanadaga nisbatan yangi boj tariflarini joriy etgan va mamlakat AQSHning 51-shtatiga aylanishi kerakligini bir necha bor ta’kidlagan. Mark Karni esa Trampning savdo siyosatini tanqid qilib, Kanadaning iqtisodiy va diplomatik mustaqilligini mustahkamlash tarafdori ekanini bildirib kelmoqda. U, shuningdek, xalqaro maydonda yirik davlatlarning iqtisodiy integratsiyadan siyosiy bosim vositasi sifatida foydalanayotganini ham tanqid qilgan.