Putin og‘ir jinoyatlar uchun sudlangan ayrim shaxslarni armiyaga qabul qilishga ruxsat berdi

Rossiya prezidenti Vladimir Putin og‘ir jinoyatlar uchun sudlangan ayrim shaxslarning Rossiya Mudofaa vazirligi bilan harbiy xizmat shartnomasi tuzishiga ruxsat beruvchi qonunni imzoladi.

Qonunga ko‘ra, endilikda quyidagi jinoyatlar uchun sudlangan ayrim shaxslar ham Qurolli kuchlar bilan shartnoma tuzishi mumkin:

naqd pul kontrabandasi;

jinoiy guruh yoki uyushgan jinoiy hamjamiyatda ishtirok etish;

qo‘riqlanadigan obyektlarga noqonuniy kirish;

terrorizmga qarshi himoya qoidalarini buzish;

strategik tovarlar va madaniy boyliklar kontrabandasi;

giyohvand moddalar noqonuniy muomalasi;

Qizil kitobga kiritilgan noyob hayvon va o‘simliklar savdosi bilan bog‘liq jinoyatlar.

Shuningdek, Putin Jinoyat kodeksiga tegishli o‘zgartirishlarni ham imzoladi. Unga muvofiq, ushbu toifadagi mahkumlar harbiy xizmatni o‘tash sharti bilan jinoiy javobgarlikdan ozod etilishi mexanizmi yangilandi.

Mazkur o‘zgartirishlar Rossiya Qurolli kuchlari safiga shartnoma asosida jalb qilinishi mumkin bo‘lgan shaxslar doirasini kengaytirishga qaratilgani qayd etilgan.