Axios nashrining xabar berishicha, AQSh prezidenti Ukraina rahbari Volodimir Zelenskiy bilan o‘tkazilgan “keskin” ruhdagi uchrashuvda Ukrainaga uzoq masofali Tomahawk qanotli raketalarini, hech bo‘lmaganda hozircha, yetkazib berish niyati yo‘qligini ma’lum qilgan.

Axios suhbatdoshlaridan biri kechagi uchrashuvning “oson kechmaganini”, Donald Trampning esa “qarori qat’iy” bo‘lganini ta’kidlagan.

“Uchrashuv davomida Tramp bir necha keskin bayonotlar berdi va ba’zi paytlarda muzokara juda hissiyotli tus oldi”, – deyiladi xabarda.

AQSh prezidentining o‘zi uchrashuvdan so‘ng uni “qiziqarli va samimiy” deb baholadi. Shu bilan birga, Tramp Kiyev va Moskvani urushni “hozirgi holatda to‘xtash” uchun kelishuvga erishishga da’vat etdi.

Ayni paytda, Zelenskiy AQSh prezidenti bilan uchrashuvdan so‘ng Tomahawk raketalari yetkazib berilishiga umid qilishda davom etayotganini bildirgan.

“Prezident Tramp “yo‘q” demagani yaxshi, ammo bugun u “ha” ham demadi”, — deya ma’lum qildi Ukraina prezidenti uchrashuvdan so‘ng bergan intervyusida.

• AQSh
• Raketa
• Ukraina