Namangan viloyati Yangiqo‘rg‘on tumanida 7 yoshli qizga nisbatan 38 yoshli qarindoshi tomonidan sodir etilgan jinoyat jamoatchilikda keng muhokama bo‘lmoqda. Oliy Majlis deputati “Milliy tiklanish” DP fraksiyasi a’zosi Dilnoza Azizova ham bu voqeaga o‘z munosabatini bildirdi.

Deputat bu holatni sistemaviy muammo deb atab, an’anaviy yumshoq jazolar bu turdagi jinoyatlarning oldini olmasligini ta’kidladi.

“Namangandagi voqea — faqat bir pedofilning razolati emas, bu jinoyatni yillar davomida “axloq tuzatish ishlari” degan yumshoq ifoda bilan oqlab kelgan tizimning yuzi. Bolaning hayoti bilan o‘ynash mumkin emas. Bu faqat jinoyat emas — insoniylikka qarshi qo‘zg‘olon” — deydi Azizova.

Unga ko‘ra, jazoning “yaxshi xulq” sababli qisqartirilishi va jinoyatchilarning erkin harakatlanishi davlatning bolalarga bo‘lgan munosabatidan darak. Shu bois deputat qonunchilikda qat’iy choralarni mustahkamlash zarurligini aytar ekan, bunday jinoyatchilarni kechirish mumkin emasligini alohida ta’kidlagan.

“Mening talabim qat’iy, bolalarga nisbatan har qanday jinsiy zo‘ravonlik uchun umrbod ozodlikdan mahrum qilish jazosi qonun darajasida belgilashning vaqti keldi” — deydi deputat.

Shuningdek, Azizova: “Bola — millatning kelajagi degan so‘zni ko‘p aytamiz. Lekin har bir bunday voqea shu so‘zni yolg‘onga chiqaryapti. Agar biz hali ham shunday pedofillarga yengil munosabatda bo‘lsak, demak, kelajakni qo‘limiz bilan yo‘q qilyapmiz”— deya o‘z fikrlarini yakunlagan.

• Deputat
• Jazo
• Taklif
• zo‘ravonlik