AQSh Markaziy qo‘mondonligi (CENTCOM) va Suriya Ichki ishlar vazirligi 24–27-noyabr kunlari IShIDning maxfiy omborlariga birgalikda zarbalar berdi. 

Ma’lum bo‘lishicha, hujumlar Suriyaning Rif-Damashq provinsiyasidagi terrorchilik tashkilotiga tegishli obyektlarga qaratilgan. Jami 15 ta joyga havo va quruqlikdan zarbalar yo‘llangan. Natijada 130 dan ortiq minomyotlar, raketalar, bir nechta miltiqlar, pulemyotlar, tankka qarshi minalar va qo‘lbola portlovchi qurilmalar uchun mo‘ljallangan materiallar yo‘q qilingan. AQSh va Suriya xavfsizlik kuchlari bir necha partiya giyohvand moddalarni ham topib, yo‘q qilgan.

“Ushbu muvaffaqiyatli operatsiya IShIDga qarshi kurashdagi yutuqlar uzoq muddatli bo‘lishini va ular terrorchilik hujumlarini qayta boshlay olmasligini yoki ularni AQSh hududiga va butun dunyoga yoya olmasligini kafolatlaydi”, – dedi CENTCOM qo‘mondoni admiral Bred Kuper.

10-noyabr kuni AQSh prezidenti Donald Tramp Vashingtondagi qarorgohida Suriya prezidenti Ahmad ash-Sharaa bilan uchrashgan edi. Shu kuni Suriyaning axborot vaziri Hamza Mustafo mamlakat IShIDga qarshi kurash bo‘yicha AQSh boshchiligidagi xalqaro koalitsiyaga qo‘shilganini aytdi.

Tramp uchrashuvdan so‘ng Ash-Sharaani “juda kuchli yetakchi” deb atab, ular yaxshi munosabatlarni yo‘lga qo‘yishga muvaffaq bo‘lganini bildirgan.

“Biz Suriya muvaffaqiyatga erishishi uchun qo‘limizdan kelganini qilamiz, chunki u Yaqin Sharqning bir qismi”, – degan edi AQSh prezidenti.

Ash-Sharaa esa 10-noyabr kuni Fox News efirida uning “Al-Qoida” terrorchilik tashkiloti bilan hamkorligi “o‘tmishdagi ish” ekani va Donald Tramp bilan uchrashuvda bu mavzu muhokama qilinmaganini bildirgan.

• AQSh
• Hamkorlik
• Havo hujumi
• IShID
• Suriya