Trampning Ukraina va Rossiya bo‘yicha maxsus vakili Kit Kellog Reuters agentligiga bergan intervyusida Ukrainada urush sabab to‘xtatilgan prezidentlik va parlament saylovlarini o‘tkazish zarurligini aytdi.

“Aksariyat demokratik mamlakatlarda urush vaqtida ham saylovlar o‘tkaziladi. Bu muhim. O‘ylashimcha, bu demokratiya uchun foydali”, – degan Kellog.

Avvalroq, Tramp uning ma’muriyati Rossiya va Ukraina o‘rtasidagi urushni to‘xtatish ustida ishlayotganini aytgan edi. Hozirgacha AQSh prezidenti ham, uning maxsus vakili ham urushni tugatish bo‘yicha strategiya tafsilotlarini oshkor qilganicha yo‘q.

“Tramp administratsiyasi, shuningdek, avval Ukraina va Rossiya o‘rtasida sulhga erishish va keyin to‘laqonli tinchlik kelishuvini ishlab chiqish masalasini ham muhokama qilmoqda. Agar Ukrainada prezidentlik saylovi o‘tkazilsa, unda g‘alaba qozongan shaxs Moskva bilan uzoq muddatli kelishuv bo‘yicha muzokaralar olib borish uchun mas’ul bo‘lishi mumkin”, – deya yozmoqda Reuters.

• AQSh
• Prezident
• Ukraina
• saylov