BBC nashrning xabar berishicha, o‘tgan hafta Singapur narkotiklar bilan bog‘liq jinoyatlar uchun uch kishini qatl qilgan va shu bilan yil davomida mamlakatdagi umumiy o‘lim jazolari soni 17 taga yetgan. Bu mamlakatda 2003-yildan beri eng yuqori ko‘rsatkich hisoblanadi.

Hukm narkotiklar bilan bog‘liq jinoyatlar uchun o‘lim jazosi mamlakat konstitutsiyasiga zid ekani yuzasidan berilgan da’vo ko‘rib chiqilishidan atigi bir hafta oldin ijro etilgan. Yevroittifoq davlatlari, shuningdek, Norvegiya, Shveysariya va Buyuk Britaniyaning diplomatik missiyalari Singapurning ikki fuqarosi hamda Malayziya fuqarosining qatl etilishini qoraladi.

Singapur hukumati esa o‘lim jazosi bekor qilinsa, yanada og‘ir oqibatlar kelib chiqishi mumkinligini ta’kidlagan. Rasmiylarning fikricha, narkotik moddalar savdosiga nisbatan keskin jazo Janubi-Sharqiy Osiyoning boshqa mamlakatlarida jiddiy muammo bo‘lgan jinoyatlarni jilovlashga xizmat qiladi. Ularning aytishicha, o‘lim jazosi Singapurni dunyodagi eng xavfsiz davlatlardan biriga aylantirishga yordam bergan.

Singapur qonunchiligida narkotik moddalarning noqonuniy aylanmasi keng talqin qilinadi — bunga ularni sotish, topshirish, tashish yoki iste’mol qilish kiradi. 15 grammdan ortiq geroin, 30 gramm kokain, 250 gramm metamfetamin yoki 500 gramm kannabis aylanmasi uchun sudlar majburiy ravishda o‘lim jazosini tayinlashi shart.

• Giyohvandlik
• Jazo
• Singapur