“Venesuela prezidenti Nikolas Maduro noyabr oyining oxirida AQSh prezidenti Donald Tramp bilan telefon orqali suhbatlashganidan so‘ng, Vashington tomonidan xavfsizlik kafolatlari bilan mamlakatni tark etish imkoniyatlarini deyarli yo‘qotdi”, – deb xabar berdi Reuters agentligi.

Prezidentlar 21-noyabr kuni suhbatlashgan, bu vaqtda AQSh Venesuelaga bosimni kuchaytirayotgan va Karib dengiziga dunyodagi eng yirik aviatashuvchi USS Gerald Ford boshchiligidagi harbiy eskadronni yuborgan edi.

“Qo‘shma Shtatlar va Venesuela yetakchilarining suhbati taxminan 15 daqiqa davom etgan. Maduro Trampga agar o‘zi va oilasiga qarshi sanksiyalar olib tashlansa hamda ularga huquqiy amnistiya berilsa, iste’foga chiqib, Venesuelani tark etishga tayyorligini bildirgan. Shuningdek, u mamlakat rahbariyatidagi taxminan 100 nafar shaxsga ham amnistiya berishni so‘ragan”, – deb yozmoqda Reuters.

Agentlik suhbatdoshlariga ko‘ra, Tramp bu shartlarga rozi bo‘lmagan va Maduroga mamlakatni tark etishi uchun bir hafta bergan. Bu muddat 28-noyabrda tugagan, shundan so‘ng Tramp Venesuela ustidagi havo makoni yopilganini e’lon qilgan.

Reuters manbalariga ko‘ra, Maduro ma’muriyati Tramp bilan yana bir telefon suhbati o‘tkazishni so‘ragan, biroq hozircha kelishuvga erishilmagan.

AQSh Venesuela va uning prezidentini narkotrafikka ko‘z yumishda ayblab keladi hamda narkotik tashiyotgani iddao qilingan kemalarga muntazam ravishda zarbalar beradi. Venesuela bu ayblovlarni rad etadi va Vashingtonning bosimini Maduroni ag‘darishga qaratilgan urinish sifatida ko‘radi.

• AQSh
• Tramp
• Venesuela