Dunyo mamlakatlarida 1-iyun – “Xalqaro bolalarni himoya qilish kuni”ni turlicha nishonlanadi, ammo hamma bolalar ham aynan shu sanada oʻz bayramlarini nishonlamaydilar. Har bir mamlakatda “Xalqaro bolalarni himoya qilish kuni” turli vaqtlarga toʻgʻri keladi va har yerda bir-biriga oʻxshamagan holda nishonlanadi.

Rossiya: Bolalar kuni aynan shu mamlakatda tugʻilgan

Rossiyada bolalar bayrami 1-iyun “Xalqaro bolalarni himoya qilish kuni”da nishonlanadi. Shu kuni mamlakatning turli burchaklarida rus bolalari oʻz bayramlarini nishonlaydilar, xalq qoʻshiqlari va raqslarini ijro etadilar, maktablarda bayram tadbirlari oʻtkaziladi.

Yaponiya: Bolalar kuni yiliga uch marta nishonlanadi

3-mart – Qizlar kuni

Ushbu bayram kichik qizlar uchun maxsus tashkil etilgan. Har yili shu kuni qizlarning ota-onalari uyda kimonodagi goʻzal bolalar qoʻgʻirchoqlari koʻrgazmasini tashkil qilishadi, bu esa ota-onalarning malikalariga sovgʻasi hisoblanadi.

5-may – Oʻgʻil bolalar kuni

Bayram kuni oʻgʻil farzandli oilaning uyiga kirish eshigi oldiga sazan baligʻi tasviri tushirilgan bayroq osib qoʻyiladi, bu esa ilmiy daraja olish imkoniyatini bildiradi. Agar oilada bir nechta oʻgʻil boʻlsa, uyning old eshiklariga yashil-koʻk bayroqlar osiladi. Bunday bayroqlarning koʻpligi oilada koʻp oʻgʻil bolalar borligini anglatadi. Yaponiyada sazan tasviri kuch va jasorat maʼnolarini bildiradi.

15-noyabr – “Yetti-besh-uch” bolalar kuni

Yapon urf-odatlariga koʻra, uch, besh va yetti yosh bolalarning eng baxtli yoshi deb hisoblanadi, shuning uchun har yili 15-noyabrda bu yoshdagi bolalar oʻz bayramlarini nishonlaydilar.

Koreya: koreys milliy libosida kiyinib, sovgʻa oling

Koreya Respublikasida bolalarni himoya qilish kuni 1923-yilda boshlangan, bu bayram dastlab oʻgʻil bolalar bayrami boʻlgan. Koreya Respublikasida bolalar kuni davlat bayrami hisoblanadi va har yili 5-may kuni nishonlanadi. Shu kuni bolalardan baxtli odam boʻlmaydi, ota-onalar ularga oʻzlari xohlagan sovgʻalarni tuhfa qilishadi. Koʻplab bolalar koreys milliy libosida kiyinib, mamlakatning anʼanaviy madaniyati namoyish etishadi.

Kolumbiya: niqobli masxarabozlar

Kolumbiyada har yili 4-iyulda bolalar kuni nishonlanadi. Ushbu bayram kuni mamlakatning barcha maktablarida turli tadbirlar oʻtkaziladi. Bolalar odatda turli xil niqoblar kiyishadi, masxarabozlar kabi kiyinadilar va koʻchalarda yurishadi. Mamlakatning har burchagida quvnoq muhit hukm suradi.

Braziliya: birinchi navbatda salomatlik

Braziliyada bolalar kuni 15-avgust kuni nishonlanadi. Bu kun, shuningdek, epidemiyaga qarshi kurash milliy kuni, shuning uchun har yili ushbu bayramda mamlakat shifokorlari bolalarni koʻrikdan oʻtkazadilar, bundan tashqari,
5 yoshgacha boʻlgan bolakaylar poliomielitga qarshi emlanadi. Bunday tadbirlar Braziliya hukumati bolalar salomatligi haqida jiddiy qaygʻurishidan dalolat beradi.

Shvetsiya: “Oʻgʻil bolalar kuni” va “Qizlar kuni”

Shvetsiyada oʻgʻil bolalar va qizlar uchun bayramlar ajratilgan. Har yili
7-avgustda “Oʻgʻil bolalar kuni” nishonlanadi, bu “Langust bayrami” deb ham ataladi. Bunday nomlanishining asosiy sababi oʻgʻil bolalar 10 oyoqli qisqichbaqa kabi jasur boʻlishidir. Shu kuni bolalar qisqichbaqa kabi kiyinib, kulgili namoyishlarni ijro etishadi.

13-dekabr kuni Shvetsiyada “Qizlar kuni” nishonlanadi, bu bayram Lusiya maʼbudasi bayrami deb ham ataladi. Lusiya – shved afsonasiga koʻra, qizlarni himoya qiladigan maʼbuda hisoblanadi. Har yili bayramda Shvetsiya qizlari boshqa bolalar uchun yaxshi ishlar qiladigan kichik maʼbudalarga aylanadi.

Afrika mamlakatlari: bir oylik bolalar karnavali

Gʻarbiy Afrika mamlakatlarida butun bir oy davom etadigan maxsus “bolalar karnavali” mavjud. Afrika aholisi tarixan qoʻshiq aytishni va raqsga tushishni yaxshi koʻradilar. Bolalar karnavalida, mamlakatdagi fuqarolarning yashash sharoitlaridan qatʼiy nazar, barcha bolalar baxtli va quvnoq holda bayramni nishonlaydilar.

Ispaniya: eng tantanali bolalar kuni

Ispaniyada bolalar kuni 5-yanvarga toʻgʻri keladi, aslida bu diniy bayram boʻlib, ispan tilidan tarjima qilinganda “sehrli qirol bayrami” degan maʼnoni anglatadi. 5-yanvar kuni tundan to erta tonggacha Ispaniyaning hamma joyida parad avtomobillarini koʻrish mumkin, ularda “uch qirol” doimiy ravishda bolalarga turli xil shirinliklar tarqatadi. Qirolning tizzasiga oʻtirgan har qanday bola maxsus sovgʻa olishi mumkin. Bunday sovgʻalarni olgan bolalar qirolga yaxshi oʻqishga vaʼda berishlari kerak boʻladi.

• Bayram
• qiziqarli