Oilada farzand dunyoga kelishi bilan hayot tarzi tubdan oʻzgarib ketadi. Bu shunchaki kun tartibi, ovqatlanish tamoyillari, uy vazifalarining taqsimlanishiga tegishli emas. Farzandli boʻlgach, har doim ogoh va sergak boʻlishingiz, bolaning uy jihozlariga zarar yetkazmasligini taʼminlashingiz ham kerak.

Koʻp hollarda bolalar uy devorlarini “sanʼat asarlari” bilan bezashadi. Xoʻsh, bolaning devorlarga chizish odati bilan kurashishdan foyda bormi?

Nima uchun bolalar devorlarga chizishni yaxshi koʻrishadi?

Kichik yoshli bolalarda miyaning ijodiy qobiliyatlar uchun javob beruvchi oʻng yarimshari faolroq ishlaydi. Bundan tashqari, ular kichik yoshda cheklovlarni tushuna olmaydilar. Atrofdagi hodisalarni tushunish va anglash bosqichi 3-5 yoshlardan boshlanadi. Bolalar yorqin ranglarni juda yaxshi koʻrishadi. Shuning uchun ham devorlarni oʻzlariga yoqadigan ranglar bilan bezashga harakat qilishadi.

Qanday chora koʻrish mumkin?

Birinchi navbatda bolaning rasm chizishi uchun qulay sharoit yaratib bering. Uning rangli qalamlarini stol ustiga joylashtiring, oʻzini esa qulay kursiga oʻtkazib qoʻying.

Agar farzandingizning surat chizishga ishtiyoqi baland boʻlsa, unga rasm chizish uchun alohida burchak yaratishingiz ham mumkin. Bolalar kichik varaqlarni yoqtirishmaydi. Shuning uchun devorlarga chizishni maʼqul bilishadi. Axir bu yerda “ijod qilish” uchun hech qanday chegara yoʻq! Bunday vaziyatda bolaga maxsus molbert olib berish tavsiya etiladi.

Boʻyashga moslangan gulqogʻozlar

Bugungi kunda sotuvda boʻyashga moslangan maxsus gulqogʻozlarni ham uchratish mumkin. Mutaxassislar ularni aynan bolalar xonasi uchun sotib olishni tavsiya qilishadi. Bunday gulqogʻozlarda jonivorlar, ertak qahramonlari, oʻsimliklar tasvirlangan boʻladi.

Ularni flomaster yordamida ham, marker bilan ham boʻyash mumkin.

Har qanday holatda ham farzandingizning bola ekanligini unutmang. Unga ijodiy qobiliyatini namoyon qilish uchun imkon bering. Devorlarga chizgan boʻlsa, qattiq gapirishga shoshilmang. Bolalar bu ishning notoʻgʻri ekanligini, taʼmirlash ishlari sizga qimmatga tushishini toʻliq anglab yetmaydilar. Shuning uchun ham ushbu vaziyatga bosiqlik bilan munosabatda boʻlish – eng yaxshi chora hisoblanadi.

• Foydali
• qiziqarli