Bugundan boshlab omonatchilar “Turkistonbank”dagi mablag‘larini qaytarib olishlari mumkin.

O‘zbekiston Markaziy banki boshqaruvining 2022-yil 7-oktyabrdagi qaroriga asosan “Turkiston” xususiy aksiyadorlik tijorat bankining faoliyat amalga oshirish huquqini beruvchi lisenziyasi tugatilgan edi.

Qayd etilishicha, fuqarolarning banklardagi omonatlarini kafolatlash fondi Kuzatuv kengashining 2022-yil 18-noyabrdagi qaroriga asosan “Turkistonbank” omonatchilarining mablag‘lari muddatidan avval qaytirilishi belgilandi.

Bugun, 21-noyabrdan boshlab “Turkistonbank” omonatchilari bo‘lgan jismoniy shaxslar omonatga joylashtirgan mablag‘lari yuzasidan agent-bank sifatida tanlangan “Qishloq qurilish bank”ga murojaat etishlari mumkin.

Shuningdek, omonatchilar qaytarib olinayotgan pul mablag‘larini o‘zlari xohlagan tarzda – naqd pul shaklida olishi, bank kartasiga ko‘chirishi yoki agent-bank bo‘lgan “Qishloq qurilish bank”ga omonatga qo‘yishi mumkin.

• Bank
• Omonatlar