31°
Kechasi 18°
Buxoro, Surxondaryo viloyatlari va Qoraqalpog‘iston Respublikasida chiqindi yoqish zavodlari qurilishiga tamal toshi qo‘yildi. Bu haqda Chiqindilarni boshqarish agentligi matbuot xizmati xabar berdi.
Chiqindilarni qayta ishlash va ulardan energiya manbai olishga asoslangan zamonaviy loyihalarni amalga oshirish bo‘yicha O‘zbekiston prezidentining tegishli topshirig‘iga muvofiq, Chiqindilarni boshqarish va sirkulyar iqtisodiyotni rivojlantirish agentligi direktori hamda Xitoyning Wangneng Environment va CSET yetakchi kompaniyalari rahbarlari o‘rtasida chiqindilarni yetkazib berish bitimi imzolangan.
Unga ko‘ra:
Buxoro viloyatida Wangneng Environment kompaniyasi ishtirokida 165 mln AQSH dollari miqdorida to‘g‘ridan to‘g‘ri xorijiy investitsiya hisobiga Kogon tumani “Guliston” MFY hududida yiliga 547,5 ming tonna qattiq maishiy chiqindilarni qayta ishlab, natijada soatiga 230 mln kVt elektr energiyasi ishlab chiqarish quvvatiga ega bo‘lgan zavod quriladi. Loyiha ishga tushirilganda qo‘shimcha 150 ta yangi ish o‘rni yaratiladi.
Surxondaryo viloyatida — CSET kompaniyasi ishtirokida umumiy qiymati 150 million AQSH dollari miqdoridagi to‘g‘ridan to‘g‘ri xorijiy investitsiya hisobiga Angor tumani “Bahor” MFY hududida yiliga 438 ming tonna qattiq maishiy chiqindilarni qayta ishlab, natijada soatiga 75 mln kVt elektr energiyasi ishlab chiqarish quvvatiga ega bo‘lgan zavod quriladi. Loyiha ishga tushirilganda qo‘shimcha 150 ta yangi ish o‘rni yaratiladi.
Ushbu zavodlar 2028-yilda ishga tushirilishi rejalashtirilgan bo‘lib, korxonalar 30 yil davomida faoliyat yuritadi.
Qoraqalpog‘iston Respublikasida CSET kompaniyasi ishtirokida umumiy qiymati 80 million AQSH dollari miqdoridagi to‘g‘ridan to‘g‘ri xorijiy investitsiya hisobiga Nukus tumani hududida yiliga 274 ming tonna qattiq maishiy chiqindilarni qayta ishlab, natijada soatiga 80 mln kVt elektr energiyasi ishlab chiqarish quvvatiga ega bo‘lgan zavod quriladi. Loyiha ishga tushirilganda qo‘shimcha 100 ta yangi ish o‘rni yaratiladi.
Bu kabi zavodlar ayni paytda respublikaning 6 ta hududi — Toshkent, Andijon, Namangan, Farg‘ona, Qashqadaryo, Samarqand viloyatlarida qurilishi davom etmoqda.
“Chiqindilar to‘g‘ri to‘planib, ko‘proq qayta ishlansa, ekologik muvozanat yaxshilanadi, tabiat toza bo‘ladi, jamiyat o‘zgaradi”, degan edi prezident Shavkat Mirziyoyev maishiy chiqindilarni qayta ishlash, ulardan elektr energiyasi va mahsulot ishlab chiqarish loyihalari taqdimoti bilan tanishganda.
O‘zbekistonda yiliga 14 million tonna chiqindilar hosil bo‘ladi, lekin ularning atigi 4-5 foizi qayta ishlanadi. Chiqindi poligonlaridan 7 million tonnadan ziyod issiqxona gazlari atmosferaga chiqadi, 43 ming tonna zaharli filtratlar yer ostiga singadi. Chiqindilarni qayta ishlash orqali ham uning tabiatga ta’sirini kamaytirish, ham foyda olish mumkin.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
