Buyuk Britaniyada bir vaqtlar XIX asrning yuqori martabali amaldori Lord Uilyam Xeyliga tegishli boʼlgan vampirlarga qarshi kurash toʼplami kim oshdi savdosi orqali sotildi.

“Mirror” nashri xabariga koʼra, vampirlarni oʼldirish uchun moʼljallangan toʼplam “yovuzlikka qarshi kurashish uchun kerak boʼlgan hamma narsani” oʼz ichiga oladi.

Qayd etilishicha, bularning barchasi qulflanadigan qutida saqlangan. Toʼplam 2000-3000 funt sterlingga baholangan, ammo auktsionda 13 000 funt evaziga sotilgan. Uning yangi egasi tashkilotchilardan oʼz ismini maʼlum qilmasliklarini soʼragan.

“Ushbu toʼplamga auktsion oldidan qiziqish kuchli edi va bunda eng yuqori dastlabki takliflar jalb qilindi. Ammo shunga qaramay, natija kutganimizdan yuqori boʼldi. Arizalar butun dunyo, jumladan Frantsiya, Amerika va Kanadadan kelib tushdi. Bu kabi narsalar kollektsionerlarni hayratda qoldiradi va bunday kim oshdi savdosini uyushtirish juda qiziq edi”, – dedi “Hansons” auktsioni tashkilotchisi Charlьz Xanson.

Toʼplam dastlab Britaniya Lordlar palatasi aʼzosi boʼlgan Britaniya Hindistonining sobiq gubernatori Lord Xeyliga tegishli boʼlgan. “Ushbu toʼplam vampirlar haqidagi afsona hayotning barcha qatlamlaridagi odamlarga taʼsir qilishini eslatib turadi”, – deya qoʼshimcha qildi Xanson.

Xeyli vampirlarga ishonganmi yoki yoʼq, bu maʼlum emas, ammo qiziq tomoni shundaki, uning Londondagi Vestminster abbatligida unga hurmat bajo keltiruvchi lavha mavjud.

Vampirlar haqidagi afsonalar XVII-XVIII asrlarda Sharqiy Yevropada paydo boʼlgan va 1819-yilda Jon Polidorining “Vampir” va 1897-yilda Brem Stokerning “Drakula” klassik asarlaridan soʼng yanada ommalashgan.

• Auksion
• Buyuk Britaniya
• Hindiston