Dubayda dunyodagi eng katta kutubxonaning ochilish marosimi bo'lib o'tdi. To‘qqizta kutubxonani birlashtirgan muassasada arab va xorijiy tillarda 1,1 milliondan ortiq bosma hamda raqamli kitoblar, 6 millionga yaqin ilmiy ishlar mavjud. Shuningdek, kutubxonadan 75 000 ta video, 5 000 ta tarixiy jurnal va 500 ta noyob kolleksiya o’rin olgan.

Bino qisman quyosh energiyasi bilan ishlaydi. Bundan tashqari, chiqindilar miqdorini 50 foizgacha qisqartirishga imkon beradigan suvni qayta ishlash tizimiga ham ega. Shuningdek, kutubxonaga kiraverishda robotlar mehmonlarni sevimli kitoblari tomon yo‘naltiradi.

Bino turli xil mavzudagi xonalarga bo‘lingan va ko‘plab o‘z-o‘ziga xizmat ko‘rsatish kioskalari bilan jihozlangan.
Xabarlarga ko‘ra, qiymati 260 million yevroga teng ushbu ulkan loyihani bunyod etishga Amir Muhammad bin Rashid Al Maktum bosh-qosh bo‘lgan. Shuningdek, Dubay shayxi mintaqadagi eng muhtoj maktablarga uch million dona kitob tarqatilishini e’lon qilgan.

• Dunyo
• qiziqarli