O‘zbekiston va Xitoy o‘rtasida o‘zaro vizadan ozod qilish to‘g‘risidagi hukumatlararo Bitim kuchga kirishi uchun davlat ichki protseduralari tugallandi. Bu haqda Tashqi ishlar vazirligi matbuot xizmati xabar berdi.

Qayd etilishicha, xalqaro shartnomaning qoidalariga ko‘ra, ushbu Bitim 2025-yil 1-iyundan boshlab kuchga kiradi. Bunda Bitim O‘zbekiston va Xitoy fuqarolari uchun ikki davlat hududiga o‘zaro vizasiz safarlarga imkoniyat yaratadi.

Bitimda ta’kidlanishicha, Tomonlar davlatlari fuqarolari ikki davlat hududlariga kirish, undan chiqish yoki tranzit qilish uchun har bir alohida bo‘lish muddati 30 kundan oshmaydigan va har qanday 180 kunlik davr ichida jami 90 kundan ortiq bo‘lmagan vaqt mobaynida viza talablaridan ozod qilinadi.

Bunda Tomonlarning davlatlari hududiga har bir kirish va bo‘lish muddati 30 kundan oshmasligi lozim.

Fuqarolar 30 kundan ko‘p vaqt qolishlari kerak bo‘lsa, ular kirish vizasini oldindan olishlari lozim.

Bildirilishicha, ko‘rsatilgan Bitim XXRning Gongkong va Makao maxsus ma’muriy hududlariga tashrif buyurishga nisbatan amal qilmaydi.

Qo‘shimchasiga, vizasiz rejim mehnat faoliyati, o‘qish va media faoliyati bilan shug‘ullanish, boshqa Tomon vakolatli organlarining oldindan roziligini talab qiladigan boshqa turdagi faoliyat bilan shug‘ullanishiga nisbatan qayd etilmaydi, deyiladi xabarda.

• O‘zbekiston
• Viza
• Xitoy