Giyohvandlik vositalari va kuchli ta’sir qiluvchi dori vositalarining noqonuniy aylanmasiga qarshi kurashish doirasida Farg‘ona viloyatida tezkor tadbir o‘tkazildi.

Xususan, Qo‘qon shahrida harakatlanayotgan Gentra rusumli avtotransport vositasi to‘xtatilib, ko‘zdan kechirilganda, unda yo‘lovchi sifatida ketayotgan, mazkur shaharda istiqomat qiluvchi, 1994-yilda tug‘ilgan shaxsga tegishli Qirg‘iz Respublikasidan kontrabanda qilingan 2797 dona “Regapen” kuchli ta’sir qiluvchi dori vositalari borligi aniqlanib, tegishli tartibda rasmiylashtirib olingan. Bu haqda DXX matbuot xizmati xabar berdi.

Hozirda ushbu shaxsga nisbatan Jinoyat Kodeksining 251-moddasi 5-qismi bilan jinoyat ishi qo‘zg‘atilib, “qamoq” ehtiyot chorasi qo‘llanildi. Tergov harakatlari olib borilmoqda.

“Hurmatli fuqarolar! Kuchli ta’sir qiluvchi va psixotrop dori vositalarini shifokor tavsiyasisiz qabul qilish sog‘liq uchun xavfli hisoblanadi. U organizm uchun jiddiy muammolar va hatto kuchli qaramlikni keltirib chiqaradi. Yurak xuruji, asab tizimidagi buzilishlar va ichki a’zolarni ishdan chiqarishga olib keladi. Eng ayanchlisi, u o‘lim holatiga ham sabab bo‘lishi mumkin.

Shu bois, yurtimizda bunday moddalarning noqonuniy aylanmasi va retseptsiz sotilishi qat’iyan taqiqlanib, javobgarlik belgilangan”, – deyiladi xabarda.

• DXX
• Dori
• Farg‘ona
• Qo'qon
• Qoidabuzarlik