AQSHda mashhur ijodkorlarning yangi albomlari taqdim etilgan kunlarda o‘lim bilan yakunlangan yo‘l-transport hodisalari soni sezilarli darajada oshgani aniqlangan. Olimlar bu holatni haydovchilarning yangi musiqalarni izlash yoki tinglash jarayonida smartfon va avtomobil multimedia tizimlaridan foydalanib, e’tiborini yo‘ldan chalg‘itishi bilan bog‘lamoqda.

Tadqiqotchilar 2017–2022-yillarda chiqarilgan va ilk kunidayoq eng ko‘p tinglangan 10 ta albomni tahlil qilgan. Ular orasida Teylor Sviftning “Midnights”, Dreykning “Scorpion” va Garri Staylsning “Harry’s House” albomlari ham bor.

Tahlil natijalariga ko‘ra, ushbu albomlar chiqarilgan kunlarda AQSHdagi eng ko‘p tinglangan 200 ta qo‘shiqning striming hajmi odatdagi kunlarga nisbatan 43 foizga oshgan. Shu kunlarda yo‘l-transport hodisalarida halok bo‘lganlar soni ham 15,1 foizga ko‘paygan.

Olimlar AQSHda 2017–2022-yillar oralig‘ida qayd etilgan 233 809 ta o‘lim bilan yakunlangan YTH ma’lumotlarini o‘rgangan. Albomlar taqdim etilgan kunlarda o‘rtacha 139,1 ta o‘lim qayd etilgan bo‘lsa, atrofdagi kunlarda bu ko‘rsatkich 120,9 tani tashkil qilgan. Natijada 10 ta albomning chiqarilish kunlari bo‘yicha jami 182 ta qo‘shimcha o‘lim hisoblangan.

Mutaxassislarning fikricha, yangi albomni topish oddiygina musiqa tinglashdan ko‘ra ko‘proq harakatni talab qiladi. Haydovchi telefonni qulfdan chiqarishi, musiqa ilovasini ochishi, kerakli albomni izlashi va qo‘shiqni tanlashi mumkin. Bunday jarayon esa bir necha soniya davomida uning ko‘zini va e’tiborini yo‘ldan chalg‘itadi.

O‘limli YTHlardagi o‘sish ayniqsa yosh va erkak haydovchilar, shuningdek, yolg‘iz harakatlanayotgan hamda avtomobilida o‘rnatilgan multimedia tizimidan foydalanayotgan haydovchilar orasida yuqoriroq kuzatilgan.

Biroq tadqiqotchilar albomlarning chiqarilishi yoki musiqa tinglash YTHlarga bevosita sabab bo‘lganini ta’kidlamagan. Tadqiqotda halokat sodir bo‘lgan vaqtda haydovchi smartfondan foydalangan-foydalanmagani aniqlanmagan. Shu sababli olimlar natijalarni statistik bog‘liqlik sifatida baholamoqda.

Tadqiqot mualliflari haydovchilarga yo‘lga chiqishdan oldin musiqa yoki albomni tanlab qo‘yish, harakat vaqtida esa telefonni ishlatmaslikni tavsiya qilgan. Agar avtomobilda yo‘lovchi bo‘lsa, musiqa boshqaruvini unga topshirish ham xavfni kamaytirishi mumkin.