Hindiston g‘arbidagi Gujarat shtatida chaqmoq urishi oqibatida kamida 24 kishi halok bo‘ldi, 23 kishi jarohat oldi. Mamlakatda bir necha kundan buyon momaqaldiroq va kuchli jala yog‘ishi davom etmoqda.
The Independent nashrining yozishicha, chaqmoq 71 bosh hayvonni nobud qilgan va 29 ta uyga zarar yetkazgan. Eng ko‘p o‘lim Dahod shahrida qayd etilgan.
Hindiston g‘arbida kuchli yomg‘ir 26-noyabrda boshlandi, 27-noyabr kuni shtatning ayrim hududlarida kun bo‘yi davom etdi. Ba’zi hududlarda bir kunda 144 millimetr yog‘ingarchilik kuzatildi.
Kuchli siklon ortidan yuzaga kelgan yog‘ingarchilik ekinlarga zarar yetkazdi va bir qancha korxonalarning yopilishiga olib keldi. Gujarat hukumati yaqin orada tabiiy ofat yetkazgan zararni baholashni boshlaydi.
Gujaratda shunga o‘xshash tabiiy ofatlar avval ham sodir bo‘lgan. 2020-yilda bu yerda ikki kun ichida 14 kishi yashin urishi va suv toshqini oqibatida halok bo‘lgan.

• Hindiston