Hindiston shimolidagi Jammu va Kashmir hududida sodir bo‘lgan otishmada o‘nlab sayyohlar halok bo‘ldi. Fojia Paxalgam shahrida yuz bergan. Sayyohlar Boysaron vodiysidagi so‘qmoq bo‘ylab ko‘tarilayotganda, qurollangan shaxslar ularga qarata o‘t ochgan. Kamida 27 kishi, jumladan, ikki nafar chet ellik halok bo‘lgani ma’lum. Otishmadan so‘ng huquq-tartibot idoralari xodimlari va tibbiyot xodimlari voqea joyiga yetib kelishgan. Mahalliy hokimiyat hodisani terakt deb baholamoqda.

Endilikda Hindiston Kashmirdagi teraktdan so‘ng Attari nazorat-o‘tkazish punktini yopdi. 1960-yilgi Ind daryosi suvlaridan foydalanish bo‘yicha bitim darhol to‘xtatildi.

Pokiston fuqarolari uchun SAARC doirasidagi vizasiz kirish tartibi bekor qilindi. Ilgari berilgan barcha SPES vizalari nollashtiriladi. Pokiston fuqarolari mamlakatni ikki sutka ichida tark etishi kerak. Bundan tashqari pokistonlik harbiy maslahatchilar Hindistondan chiqarib yuborilishi kutilmoqda.

Ayni paytda Saudiya Arabistonida bo‘lib turgan Hindiston Bosh vaziri Narendra Modi mamlakat ichki ishlar vaziri Amit Shoh bilan telefon orqali bog‘lanib, undan zudlik bilan choralar ko‘rishini va voqea joyiga borishni so‘ragan.

“Terrorizmga qarshi kurashish borasidagi qat’iyatimiz mustahkam va yanada kuchayadi”, – deb yozgan Modi X ijtimoiy tarmog‘idagi sahifasida.

Amit Shoh Jammu va Kashmirga “barcha idoralar bilan xavfsizlik masalalari bo‘yicha shoshilinch yig‘ilish” o‘tkazish uchun yo‘l olgan.

Ma’lum qilinishicha, terakt uchun javobgarlikni “Qarshilik fronti” guruhi o‘z zimmasiga olgan.

• Hindiston
• Pokiston
• Terakt