2023-yilning 4-mart kuni soat taxminan ertalabki 07:50 larda Navoiy shahrida joylashgan “Markaziy dehqon bozori”ga Navoiy viloyati Navoiy shahrida fuqaro Z.U. bozor hududiga kelib chiqishi nomaʼlum boʻlgan, tegishli veterinariya hujjatlariga ega boʻlmagan, tashqi koʻrinishidan qizargan jami ogʻirligi 220 kg. boʻlgan yirik shoxli mol goʻshti mahsulotini sotish maqsadida olib kelgan.

Shu vaqtda Navoiy viloyati IIB JXX JTSB Karantin tadbirlarini taʼminlash guruhi xodimlari tomonidan shubha uygʻotganligi uchun belgilangan tartibda tekshirilib, tegishli hujjatlari boʻlmaganligi hamda kelib chiqishi nomaʼlum boʻlganligi uchun xolislar ishtirokida hujjatlar rasmiylashtirilib olib kelingan goʻsht mahsulotlarning sifatiga aniqlik kiritish (isteʼmolga yaroqlilik darajasi) maqsadida viloyat veterinariya va chorvachilikni rivojlantirish boshqarmasiga qarashli Tashxis markaziga (laboratoriya) olib borilgan.

Viloyat laboratoriyasining joriy yil 7-mart kunidagi xulosasiga koʻra jami ogʻirligi 220 kg. boʻlgan yirik shoxli mol goʻshti insonlar isteʼmoli uchun yaroqsiz deb topilgan.

Shuningdek, Bosh prokuratura huzuridagi Departamentning Guliston shahar boʻlimi tomonidan shahar Veterinariya va chorvachilikni rivojlantirish boʻlimi hamda IIB xodimlari bilan hamkorlikda oʻtkazilgan tergovga qadar tekshiruvda, fuqaro I.U. boshqaruvidagi “DAMAS” rusumli avtotransport vositasida isteʼmolchilarning hayoti va sogʻligi xavfsizligi talablariga javob bermaydigan 250 kg. mol goʻshtini oʻtkazish maqsadida olib ketayotganligi aniqlanib, ashyoviy dalil sifatida olingan.

Maʼlum qilinishicha, mazkur holat yuzasidan Jinoyat kodeksining 186-moddasi (xavfsizlik talablariga javob bermaydigan tovarlarni oʻtkazish maqsadini koʻzlab ishlab chiqarish, saqlash, tashish yoxud oʻtkazish, ishlar bajarish yoki xizmatlar koʻrsatish) bilan jinoyat ishi qoʻzgʻatilib, tergov harakatlari oʻtkazilmoqda.

• Departament
• Go‘sht
• IIV
• Navoiy