“Tesla” bosh direktori Ilon Mask kompaniyaning 7,9 million dona aksiyasini 4-avgust kuni bo‘lib o‘tgan kompaniya aksiyadorlarining yillik yig‘ilishidan so‘ng 6,9 milliard dollarga sotib yubordi. Manbalarga ko‘ra, tadbirkor sud agarda Twitter’ni sotib olishga majbur qilsa, o‘z aksiyalarini favqulodda arzonroq narxda sotilmasligi uchun shunday qarorga kelgan.

Aprel oyi oxirida Mask Twitter rahbariyati bilan kompaniyani sotib olish bo‘yicha kelishuv fonida 4 milliard dollarlik “Tesla” aksiyalarini sotgan edi. Iyul oyida tadbirkor ijtimoiy tarmoqni sotib olishdan bosh tortdi. Chunki Twitter platformadagi soxta akkauntlar soni haqidagi haqiqiy ma’lumotni yashirganligi aytilmoqda.

Kelishuvni yakunlashdan bosh tortgani uchun Twitter Ilon Maskni sudga berdi. 6-avgust kuni biznesmen agar Twitter ijtimoiy tarmoqdagi botlar soni haqida to‘liq ma’lumot bersa, bitim tuzishga tayyorligini aytib o‘tdi.

• Ilon_Mask
• Tesla
• Twitter