Quyidagi 8 turdagi ziravorlar odam immunitetini oshirgan holda salomatlikni mustahkamlashga yordam beradi.

Qora murch

Eng oddiyidan boshlaylik. Ushbu ziravor deyarli har bir oshxonada bor. Qora murch ko‘plab antioksidantlarga ega, ular hujayralarni erkin radikallar ta’siridan himoya qiladi, ya’ni ular organizmdagi yallig‘lanish va boshqa xavfli jarayonlar darajasini pasaytiradi. Shuni alohida ta’kidalash kerakki, donali murch kukunga aylantirilganidan ko‘ra uzoq yillar davomida o‘z xususiyatlarini saqlab qoladi. 

Zanjabil

Yangi zanjabil va uning sharbati eng foydali ziravorlardan biridir. Uni turli xil salatlarga yoki qaylalarga qo‘shib iste’mol qilish mumkin. Zanjabil metabolizmni mukammal darajada tezlashtiradi va A, C, B1, B2 vitaminlari, magniy, fosfor, temir, kalsiy, rux va kaliy bilan tanani oziqlantiradi. Issiqlik ta’sirida ba’zi vitaminlar yo‘qolib ketsa-da, zanjabilli choy yoki boshqa iliq ichimlik juda foydali bo‘ladi. Bunday ichimliklar oshqozonni tinchlantiradi va ko‘ngil aynishni kamaytiradi. Zanjabilni sho‘rva yoki boshqa taomlarga ham qo‘shsa bo‘ladi. 

Dolchin

Ushbu ziravor qondagi xolesterin, shakar va triglitseridlar (yog‘lar) darajasini pasaytiradi. Dolchinni nafaqat shirinliklarga, balki sabzavotlardan pishirilgan (kartoshka, qovurilgan karam, qovurilgan brokkoli) issiq ovqatlarga qo‘shishga harakat qiling. Shakar qo‘shmasdan shirinlik tayyorlashni istaganingizda dolchin sizga asqatadi. U bilan zararsiz, ammo shirin yeguliklar tayyorlash mumkin. Masalan, yogurtlar, yormali bo‘tqalar, pudinglar dolchin bilan juda mazali bo‘ladi. Shu bilan birga dolchin baxt gormonlari ishlab chiqarilishiga yaxshi ta’sir qiladi va kayfiyatni ko‘taradi.

Sariq zanjabil (kurkuma)

So‘nggi paytlarda bu ziravor sog‘lom turmush tarzining ajralmas bir bo‘lagiga aylanib bormoqda. U immunitet tizimini mustahkamlaydi va kognitiv funksiyalarni yaxshilaydi. Bundan tashqari, undan uy sharoitida yuz uchun turli foydali niqoblar tayyorlash mumkin. 

Muskat yong‘og‘i

Tanadagi yallig‘lanish jarayonlarini kamaytirish va himoya funksiyalarini oshirishning yana bir usuli. Muskat yong‘og‘ini shirinliklar va issiq ichimliklar bilan iste’mol qilish mumkin. Uning yana bir foydali tomoni shundaki, u tish emalini yemirilish (kariyes)dan asraydi. 

Zira 

Immunitetning ko‘tarilishi va metobalizmning yaxshilanishi ko‘p jihatdan ovqat hazm qilish tizimining to‘g‘ri ishlashiga bog‘liq. Zira oshqozon va ichaklarga ijobiy (birinchi navbatda tinchlantiruvchi) ta’sir qilishi bilan juda foydali. Zirani asosan yog‘li va go‘shtli taomlar tayyorlayotganda ishlatgan ma’qul. 

Oregano

Oregano sovuq mavsumda yallig‘lanishning oldini olishga yordam beradigan samarali antibakterial vositadir. U ovqat hazm qilish tizimini tinchlantirishda va oshqozon shamollashida yaxshi yordam beradi.

Qalampir kukuni

Qalampir kukuni og‘riqni qoldirishga yordam beradi. Albatta, taomga yangi uzilgan qalampir solish juda foydali. Ammo quritib kukunga aylantirilgan qalampirda ham foydali moddalar ko‘p bo‘ladi. 

Diqqat! Agar sizda oshqozon-ichak trakti bilan bog‘liq muammolar bo‘lsa, har qanday ziravorni doimiy ravishda ishlatishdan oldin shifokoringizga murojaat qiling.

• Foydali
• salomatlik