“Men ishimni yomon ko‘raman”. Shu so‘zlarni kimgadir aytganingizda, ular sizga “daraxt bir joyda ko‘karadi”, degan naqlni aytgan, to‘g‘rimi? Biroq siz daraxt emassiz, unutmang. Agar rostdan ham hozirgi ishingizdan ko‘nglingiz to‘lmasa, sizda uchta variant bo‘ladi. Ulardan biri – o‘zingiz qilayotgan ishingizdan zavqlanmasangiz ham, u yerda ishlashda davom etasiz, ikkinchisi – vaziyatni yaxshilashga harakat qilasiz, uchinchisi – bu ishni tashlab, hayotning keyingi bosqichiga o‘tasiz.  

Biroq har doim vaziyatni yaxshilash imkoniyati mavjud. Siz yomon ko‘rgan ishni qanday tark etishni o‘ylashdan oldin, keling, o‘z ishingizni qanday sevish kerakligini ko‘rib chiqaylik.

“Ishimni yomon ko‘raman” kabi fikrlarni tinch qo‘ying

Ishingizdan nafratlanishni davom ettirish variant emas. Nega? Yangi ish topish oson emas va ishonchli biznes daromadini yaratish vaqt talab qilishi mumkin. “Men o‘z ishimni mutlaqo yomon ko‘raman”, degan fikrdan “hozircha ishim joyida” yoki hattoki “menga shu kunlarda ishim juda yoqadi” degan fikrga o‘tishning ko‘plab usullari mavjud. Ya’ni, vaziyatni yaxshilash uchun harakat qiling va hissiy holatingizni yaxshilash uchun nuqtayi nazaringizni o‘zgartiring.

Ish haqiqatan ham muammo ekanligini aniqlang

Ishni “Men ishimni yomon ko‘raman”, deb o‘ylashga majbur qiladigan narsalar ro‘yxatini tuzishdan boshlang. Nafratga nima sabab bo‘layotganini aniqlashga harakat qiling. Bu yomon xo‘jayinmi? Haddan tashqari raqobatbardosh hamkasblarmi? Siz bajara olmaydigan yoki yaxshi bajara olmaydigan yangi va qo‘shimcha mas’uliyatmi? Ish yuki birdan ortdimi yoki kamaydimi? Bu sizga muammoni hal qilishga ko‘mak beradi. Bundan tashqari, agar siz ish qidirishni boshlashga qaror qilsangiz, keyingi ishingizda nimani xohlamasligingizni aniqlashga yordam beradi.

Maqsadlarni belgilang

Endi nima uchun ishingizdan nafratlanayotganingizni aniqlaganingizdan so‘ng, vaziyatni yaxshilash yo‘llarini ishlab chiqishga harakat qiling. Kichik g‘alabalarni qidiring. Agar siz nimanidir yaxshilasangiz, bu katta o‘zgarishlarga olib kelishi mumkin. 

Nima uchun bu ishni qabul qilganingizni o‘zingizga eslating

Ishingizdan qanchalik nafratlansangiz ham, ish topishdan umidvor bo‘lgan millionlab ishsizlar haqida o‘ylab ko‘ring. Sizning ishingiz mukammallikdan uzoq bo‘lsa-da, bu hali ham ish. Bu sizga maosh to‘laydi va jamiyatga hissa qo‘shish imkoniyatini yaratadi.

Ba’zan bu ishni boshlaganingizda ega bo‘lgan motivatsiyani bir eslab ko‘ring. Ehtimol, yaxshigina maosh, ishingiz uyga yaqin yoki shaxsiy rivojlanish uchun foydasi katta. Ijobiy fikrlashni yaratishdan tashqari, siz uchun nima muhimligini tushunish keyingi qadamlaringizni oqilona tanlashga yordam beradi. “Minnatdorchilik hayotning to‘liqligini ochadi”, – deb yozadi yozuvchi Melodi Bitti. – “Bu bizda mavjud bo‘lgan narsalarni yetarlicha va yana ko‘p narsalarga aylantiradi. Bu rad etishni qabul qilishga, tartibsizlikni aniqlikka, ovqatni ziyofatga, begona odamni do‘stga aylantiradi”.

Nima qilishni yaxshi ko‘rishingizni aniqlang

Muallif va motivatsion ma’ruzachi Saymon Sinek shunday deydi: “Bizga yoqmaydigan narsa uchun qattiq ishlash stress deb, biz sevgan narsa uchun qattiq ishlash esa ehtiros deb ataladi”.

Hayotingizga foyda keltirmaydigan va vaqtingizni behuda sarflaydigan mashg‘ulotlardan voz keching. Tejagan vaqtingizdan o‘zingizga yoqadigan ishni bajarish uchun foydalaning. “Men ishimni yomon ko‘raman” deyish oson, lekin o‘z qulayligingiz uchun harakat talab qilinadi. Nima bo‘lishidan qat’i nazar, nima qilishni yaxshi ko‘rishingizni bilsangiz, buni kundalik ishingizga kiritishingiz mumkin.

Yordam so‘rang

Stressli, g‘azablangan, haddan tashqari siqilgan yoki ishda haqoratlanganda yordam so‘rash uyat emas. Amerika Qo‘shma Shtatlarining 44-prezidenti Barak Obama, “Sizga kerak bo‘lganda yordam so‘rashdan qo‘rqmang. Men buni har kuni qilaman. Yordam so‘rash zaiflik belgisi emas, bu kuch belgisidir”, degan ekan. Vaziyatingizni yaxshilash yo‘llarini aniqlash uchun ishonchli hamkasbingiz, menejeringiz yoki oila a’zolaringiz bilan maslahatlashing.

Aloqani rivojlantirishga harakat qiling

Ishingizdan maqsad topishda qiynalayapsizmi? Agar ma’nosiz bo‘lib tuyulsa, o‘zingizni ishga bog‘lash yo‘llarini topib, ishingizda ma’no yarating. Hamkasblaringiz bilan do‘stlashing. Boshqalar bilan aloqa o‘rnatish sizga o‘z ishingizda tirishqoqroq bo‘lishga yordam beradi. Odamlar bir-biriga bog‘langan bo‘lsa, hayot yanada to‘liqroq bo‘ladi. Hamkasblaringiz bilan aloqani mustahkamlash yo‘llarini qidiring, shunda ishingiz shunchaki daromad manbayi bo‘lmaydi.

Rahbaringiz bilan “ochiq bo‘ling”!

Xo‘jayiningiz bilan ishingizni yomon ko‘rishingiz sabablarini muhokama qilish qiyin bo‘lishi mumkin, ammo buni bajarish lozim. Agar siz har kuni bir xil vazifalarni bajarish monotonligidan zeriksangiz, xo‘jayiningizga boring va ular sizga berishga tayyor bo‘ladigan yangi mas’uliyat bor-yo‘qligini so‘rang. Ehtimol, ular sizni qiziqtirgan sohadagi loyihada yordam izlayotgandir. Agar so‘ramasangiz, bilmaysiz! Shu bilan bir qatorda, kompaniyada boshqa lavozimlar paydo bo‘lsa, xo‘jayiningizdan sizga xabar berishini so‘rashingiz mumkin. Vaqt o‘tishi bilan o‘zingiz yoqtirgan sohaga o‘tish imkoniyatiga duch kelishingiz mumkin.

Ishingizga zavq bag‘ishlang

Siz zavod liniyasida yoki ofisda ma’lumotlarni kiritish xodimi sifatida ishlashingiz mumkin. Sirtdan bu ishlar zerikarli ko‘rinar, balki. Biroq agar zavqlanish umidi bilan ishga borsangiz, natijalar sizni hayratda qoldiradi. Ish kuningizga zavq bag‘ishlash usullari orasida xushchaqchaq hamkasblar bilan tanaffuslar o‘tkazish, ishda qo‘shiq aytish, hamkasblar bilan hazil qilish kiradi. Professional bo‘lish – har doim jiddiy bo‘lish kerakligini anglatmasligini tushunishdir.

Ish joyingizni qulaylashtiring

Eng yaxshi narsalardan biri bu – shaxsiy ish muhitingizni nazorat qilishdir. Misol uchun, agar ofisda ishlasangiz, stolingiz va tortmalaringiz toza va tartibli ekanligiga ishonch hosil qiling. Keyin ish stolingizga bezakli o‘simlik yoki yaqinlaringizning rasmini qo‘yish orqali ham qandaydir ishchanlik muhitini oshirish mumkin.

Dam oling

Dam olish Karib dengiziga qimmat sayohat bo‘lishi shart emas. Hayotingiz haqida fikr yuritish va kelajagingizga e’tibor qaratish uchun har qanday ta’til vaqtidan foydalaning. Bu ish qidirish va intervyularga borish yoki vaqtingizni qimmatli maslahatlar beradigan do‘stlaringiz va oila davrasida o‘tkazish uchun ishdan bo‘sh vaqt bo‘lishi ham mumkin. Vaqtingiz bo‘lishi bilan siz haqiqatan ham ishingizdan ketishni xohlaysizmi va agar shunday bo‘lsa, keyingi qadamlaringiz qanday bo‘lishi haqida o‘ylashingiz kerak.

Xulosa shuki, qaroringiz qanday bo‘lishidan qat’i nazar, vaziyatingizni yaxshilang. Bu qo‘shimcha aqliy yukni yaratishga arzimaydi. Siz yuqoridagi tavsiyalardan birini tanlashingiz mumkin, bu hech narsa qilmaslik va yildan yilga tushkunlikka tushishdan ko‘ra yaxshiroqdir. Ishingizdan nafratlanish sizni yangi va muvaffaqiyatli hayotga undash uchun kerak bo‘lgan omil bo‘lishi mumkin. Hozir harakat qiling!

Shuni yodda tutingki, siz haqiqatan ham katta o‘zgarishlarga va maqsadlarga erishishga qodirsiz. O‘rtamiyonalikka rozi bo‘lishni to‘xtating va o‘z orzuingiz bilan yashashni boshlang! O‘zingiz istamagan hayotga rozi bo‘lishingiz shart emas. O‘zingiz xohlagan hayotga intiling.

• Foydali
• Karyera
• qiziqarli