Jahon sog‘liqni saqlash tashkiloti (JSST) ma’lumotlariga ko‘ra, 2024 yilda dunyo bo‘yicha semizlik 3,7 mln kishining o‘limiga sabab bo‘lgan. Tashkilot, shuningdek, 5 yoshdan 19 yoshgacha bo‘lgan 170 mln nafar bola va o‘smir semizlikdan aziyat chekayotganini ma’lum qildi.

Ularning 70 mln nafari 5–9 yoshdagi bolalar, 100 mln nafari esa 10–19 yoshdagi o‘smirlardir. Mazkur yosh guruhida semizlikning tarqalishi 1990 yildan buyon to‘rt baravar oshgan: o‘sha yili ko‘rsatkich 2 foizni tashkil etgan bo‘lsa, 2024 yilda 8 foizga yetgan.

JSST bolalarda semizlikni davolash bo‘yicha ilk tavsiyalarini ham e’lon qildi. Unda jismoniy faollikni oshirish, sog‘lom ovqatlanish va xulq-atvorni o‘zgartirishga qaratilgan choralar tavsiya etilgan. Tashkilot 9 yoshgacha bo‘lgan bolalarda semizlikni davolash uchun dori vositalari, vazn kamaytirishga qaratilgan jarrohlik amaliyotlari yoki maxsus qurilmalardan foydalanishni tavsiya etmaydi.

Tashkilotning ta’kidlashicha, semirish muammosini faqat davolash orqali hal etib bo‘lmaydi. Shu bois davlatlar sog‘lom ovqatlanish va jismoniy faollikni aholi uchun yanada qulay va hamyonbop qilishga qaratilgan choralarni ko‘rishi kerak.

JSST ma’lumotlariga ko‘ra, semizlik yurak-qon tomir kasalliklari, 2-tur diabet va ayrim saraton turlarini o‘z ichiga olgan yuqumli bo‘lmagan kasalliklar rivojlanishining asosiy omillaridan biridir. Tegishli choralar ko‘rilmasa, 2030 yilga borib dunyoda semizlikdan aziyat chekayotganlar soni ikki baravar oshishi mumkin.