Italiya Falastinni davlat sifatida tan olish uchun ikkita shart qo‘ydi. Mamlakat bosh vaziri Jorja Meloni tegishli BMT Bosh Assambleyasi doirasidagi muloqot chog‘ida tegishli shartlarni ilgari surdi.

Shartlarga ko‘ra, barcha isroillik garovdagilar ozod qilinishi va AQSh, Yevroittifoq tomonidan terrorchi deb tan olingan XAMAS vakillari hokimiyatdan chetlashtirilishi kerak. Meloni siyosiy bosimni asosan XAMASga qaratishga chaqirmoqda. Bosh vaziri urushni “aynan shu guruh” boshlagani va garovdagilarni ozod qilishdan bosh tortib, uning tugashiga “to‘sqinlik qilayotgani”ni aytdi.

Bugungi kunda BMTga a’zo 193 davlatdan 150 dan ortig‘i Falastinni davlat sifatida tan olgan. 80-sessiya arafasida Buyuk Britaniya, Avstraliya, Kanada, Portugaliya, Fransiya, Belgiya, Monako, Malta va Lyuksemburg ham o‘z navbatida bunday qarorni e’lon qildi.

AQSh esa, Isroil singari, Falastinni tan olishga keskin qarshi. Prezidenti Donald Tramp bunday qarorni “XAMASni mukofotlash” deb biladi.

“Afsuski, XAMAS tinchlik yo‘lidagi oqilona takliflarni bir necha marta rad qildi. Endi esa BMTning ayrim a’zolari Falastinni mustaqil davlat sifatida tan olmoqda. Bu urushni rag‘batlantirish sifatida baholanadi. Falastinni tan olish XAMAS uchun katta mukofot bo‘ladi. Bu 7-oktyabr voqealari jumladan, ularning dahshatli jinoyatlari uchun mukofot bo‘lgan bo‘lardi”, – degan AQSh yetakchisi.

Xuddi shunday fikrni ilgariroq Isroil bosh vaziri Binyamin Netanyaxu ham bildirgan edi. BMT Bosh Assambleyasi 12-sentyabr kuni Falastin-Isroil munosabatlarini tartibga solishda “ikki xalq uchun ikki davlat” tamoyiliga qaytish chaqirig‘i bilan rezolyutsiya qabul qildi.

Fransiya va Saudiya Arabistoni tomonidan taqdim etilgan ushbu hujjat loyihasini Germaniya qatori 142 ta davlat qo‘llab-quvvatladi, AQSh va Isroil bilan birga o‘nta davlat qarshi ovoz berdi. BMTga a’zo 12 ta mamlakat betaraf qoldi.

• Falastin
• Italiya
• Jorjo Meloni