Janubiy Koreyada politsiya harbiy holat joriy etilishi bo‘yicha olib borilayotgan tergov jarayonida mamlakat harbiy razvedka qo‘mondonligining sobiq va ayni paytdagi rahbarlarini hibsga oldi. Bu haqda Yonhap axborot agentligi xabar berdi. “Tergov guruhi hozirgi qo‘mondon general-mayor Mun San Ho va qo‘mondonlikning sobiq rahbari Noh San Vonni hibsga olganini ma’lum qildi”, – deyiladi xabarda.

Qo‘mondonlik rahbari prezident kutilmaganda harbiy holat e’lon qilganidan so‘ng Kvachxondagi Milliy saylov komissiyasi idorasiga qo‘shin yuborganlikda gumonlanmoqda. Armiya voqea joyiga ikki daqiqada yetib borgani sababli, huquqni muhofaza qilish organlari xodimlari Munning prezident harbiy holat e’lon qilish niyatidan xabardor bo‘lgani haqida taxmin qilmoqda.

Janubiy Koreya qonunlariga ko‘ra, politsiya rahbarlarni so‘roq qilish uchun 48 soat ushlab turishi mumkin. Bu vaqt oralig‘ida sud tomonidan rasmiy qamoq orderi berilmasa, Mun San Ho va Noh San Von ozodlikka chiqarilishi kerak.

• Janubiy Koreya
• razvedka