Bloomberg xabariga ko‘ra, oltin narxi 30-yanvar kuni to‘rt foizdan ko‘proqqa arzonlashib, bir unsiyasi 5 208,93 dollar atrofida baholandi. Uning narxi 29-yanvar kuni 5500 dollardan oshib, tarixiy rekord o‘rnatgan edi.

30-yanvar kuni oltin quymalari narxi 4,8 foizga pasaydi. Kumush narxi 4,9 foizga tushib, 110,0425 dollar bo‘ldi. Platina va palladiy narxlarida ham pasayish kuzatilgan. Dollar indeksining 0,5 foizga oshishi qimmatbaho metallarga bo‘lgan xaridlarni qiyinlashtirdi.

Oltin yil boshidan buyon 20 foizdan ko‘proqqa qimmatlashgan edi. Bunga Trampning xalqaro tartibni keskin o‘zgartiruvchi siyosati va Federal zaxira tizimi mustaqilligiga qilgan tanqidlari sabab bo‘lgan. Shuningdek, AQSh prezidentining Eronga zarba berish tahdidi va Kubaga neft yetkazib beruvchi davlatlarga boj joriy etish rejasi bozorlardagi taranglikni kuchaytirdi.

• Kumush
• Narx-navo
• Oltin