Daniya ishlab chiqaruvchisi Bavarian Nordic A/S kompaniyasining MVA-BN vaksinasi Jahon sog‘liqni saqlash tashkilotining dastlabki kvalifikatsiyasidan o‘tdi va maymunchechakka qarshi birinchi dori bo‘ldi. Bu haqda JSST sayti ma’lum qildi.

Unga ko‘ra, MVA-BN vaksinasi 18 yoshdan oshgan odamlarga to‘rt haftalik interval bilan ikki dozada inyeksiya sifatida berilishi mumkin.

Aniqlanishicha, MVA-BN’ning infeksiya manbasi bilan kontaktdan oldingi bir martalik dozasi maymunchechakdan himoya qilishda 76 foiz samaradorlikni, ikki dozada esa taxminiy samaradorlik 82 foizga yetishini ko‘rsatadi.

Shuningdek, JSST rahbari Tedros Adhanom Gebreyesus ham vaksina bo‘yicha o‘z fikrlarini bildirgan.

“Maymunchechakka qarshi vaksinaning dastlabki kvalifikatsiyasi Afrikadagi hozirgi epidemiyalar sharoitida ham, kelajakda ham ushbu kasallikka qarshi kurashimizdagi muhim qadamdir. 

Biz hozir zudlik bilan bu vaksinalar eng zarur bo‘lgan joylarda adolatli taqsimotni ta’minlash uchun vaksinalarni xarid qilish, xayriya va foydalanish masshtabini kengaytirishimiz kerak”.

• JSST
• Maymun chechagi