“Karib dengizi qaroqchilari” franshizasining navbatdagi filmlarida Jek Chittak obrazini aktrisa Margo Robbi ijro etishi mumkin. Bu haqida film prodyuseri Jerri Brukxaymer maʼlum qildi.

Aktrisaga qaroqchi roli allaqachon taklif qilib boʻlingan. Ijodkor filmda suratga tushishga rozilik berishi bilan Jonni Deppning oʻrnini egallaydi.

“Biz ayni vaqtda Margo Robbi bilan aloqadamiz va film uchun ikkita stsenariy tayyorlayapmiz. Ularning birida Margoning ishtiroki nazarda tutilgan boʻlsa, ikkinchisi aktrisa rolga rozilik bermay qolishi mumkinligini hisobga olib yozilmoqda”, deydi Brukxaymer.

Yaqindagina Jonni Depp “Karib dengizi qaroqchilari” filmiga qaytish niyati yoʻqligini aytib oʻtgandi. U franshizadagi rolidan sobiq turmush oʻrtogʻi Ember Xerdning ayblovlari tufayli mahrum boʻlgan. Ember Xerd Jonni Deppni jismoniy zoʻravonlikda ayblangan. Ayni vaqtda juftlik oʻrtasidagi sud jarayonlari davom etmoqda.

• Kino
• Madaniyat
• San’at
• mashhurlar