Amerika Kino akademiyasi “Kelajakka qaytib” filmi yulduzi Maykl Jey Foksni Jin Xersholt nomidagi “Oskar” mukofoti bilan taqdirladi. Ushbu nufuzli mukofot ijodkorga Parkinson kasalligiga qarshi kurashga qo‘shgan hissasi uchun berilgan.

Aktyor mukofotni Amerika Kino akademiyasi tomonidan tashkil etilgan “Governors Awards” taqdirlash marosimida yaqin do‘sti, aktyor Vudi Xarrelsonning qo‘lidan qabul qilib oldi.

“Aktyor tomonidan asos solingan Maykl Jey Foks fondi Parkinson kasalligini tadqiq qilish uchun bugungi kunga qadar 1 milliard AQSh dollari miqdorida pul jamg‘argan. Foks qanday kurashish va qanday yashash kerakligi ko‘rsatib beruvchi namuna. Bugungi kunda uni nafaqat aktyor sifatida, balki hayriya ishlari uchun ham yaxshi ko‘rishadi”, - dedi Vudi Xarrelson.

Ma’lumot uchun, Parkinson - markaziy asab tizimiga asta-sekin hujum qiluvchi kasallik bo‘lib, u odatda 50 yoshdan oshgan insonlarda kuzatiladi. Aktyor Maykl Jey Foksga Parkinson kasalligi tashxisi 30 yoshida qo‘yilgan. Ijodkor kasallikni tadqiq qilish maqsadida 1998-yilda o‘z fondiga asos solgan. Mazkur fond kasallikka chalingan insonlarni qo‘llab-quvvatlash, Parkinsonni o‘rganish va unga davo topish ustida ish yuritadi.

• Kino
• Madaniyat
• Oskar
• Taqdirlash
• salomatlik