Taqdimotda tadbirkorlik sohasidagi majburiy talablarni qayta ko‘rib chiqish va ularni maqbullashtirish masalasi muhokama qilindi.

Bugungi kunda bozorlar faoliyatiga oid 20 ga yaqin hujjatda 500 dan ortiq talablar tarqoq holatda yuritilmoqda. Ularni tizimlashtirish orqali talablarning 30 foizdan ortig‘ini maqbullashtirish imkoniyati mavjudligi qayd etildi.

Shuningdek, sanitariya talablariga muvofiqlik dalolatnomasi hamda tekshiruvdan o‘tadigan xodimlar ro‘yxatini elektron tizim orqali shakllantirish taklifi ilgari surildi.

Taqdimotda barcha majburiy talablarni yagona Majburiy talablar reyestriga kiritish, ularni amaliy ko‘rsatkichlar asosida baholash va kompleks monitoring tizimini joriy etish rejalari ko‘rib chiqildi.

BAA va Singapur tajribasi asosida samarasiz, eskirgan va ortiqcha byurokratik talablarni bekor qilish, “Biznes kalkulyator”, “gilyotina” usuli hamda “one in — one out” mexanizmlarini joriy etish rejalashtirilmoqda.

Shuningdek, har bir talabning samaradorligini muntazam kuzatish va har 3 yilda qayta baholash tizimini joriy etish nazarda tutilgan.