Belarus prezidenti Aleksandr Lukashenko 28-fevraldan 2-martgacha Xitoyga davlat tashrifi bilan boradi.

Ushbu tashrif Xitoy Xalq Respublikasi bilan do‘stlik va o‘zaro manfaatli hamkorlik aloqalarini o‘rnatish bo‘yicha ko‘p yillik kursning davomi bo‘lishi aytilmoqda.

Pekinda Lukashenko XXR raisi Si Szinpin bilan uchrashadi, muzokaralar tor va kengaytirilgan tarkibda bo‘lib o‘tadi. Ularning yakunlari bo‘yicha muhim sohalarda munosabatlarni rivojlantirish bo‘yicha katta hujjatlar to‘plami imzolanishi kutilmoqda.

Savdo-iqtisodiy, investitsiyaviy va gumanitar hamkorlikni rivojlantirish, qo‘shma keng ko‘lamli loyihalarni amalga oshirish, siyosiy sohadagi o‘zaro hamkorlik, zamonaviy xalqaro sharoitda eng dolzarb muammolarga javob berish masalalariga e’tibor qaratiladi.

Bundan tashqari, Belarus prezidenti XXRning yuqori lavozimli amaldorlari va Xitoyning yetakchi korporatsiyalari rahbariyati bilan uchrashuvlar o‘tkazadi.

Lukashenko va Si Szinpin 2022-yilning sentyabr oyida Samarqanddagi Shanxay hamkorlik tashkiloti sammiti maydonlarida uchrashgan edi. Keyin ular munosabatlarni keyingi bosqichga – har qanday ob-havo va har tomonlama strategik sheriklikka olib chiqish to‘g‘risida qo‘shma deklaratsiyani qabul qilgandilar.

• Belarus
• Lukashenko
• Si Szinpin
• Xitoy