Venesuela prezidenti Nikolas Maduroning o‘g‘li — Nikolas Maduro Gerra AQSh tomonidan otasi qo‘lga olinganidan so‘ng unga omma oldida murojaat qildi. Bu haqda Daily Mail nashri xabar berdi.

Siyosatchi ilk bor Karakas shahrida, Venesuela Milliy assambleyasida bo‘lib o‘tgan yig‘ilishda otasining qo‘lga olinishi yuzasidan fikr bildirdi. “Dada, siz oilamizdagi barchani kuchli insonlarga aylantirdingiz. Siz qaytguningizcha biz o‘z burchimizni bajaryapmiz. Vatan ishonchli qo‘llarda, dada. Va tez orada biz shu yerda — Venesuelada yana bir-birimizni quchoqlaymiz”, — dedi u ko‘z yoshlarini yashirmay.

Maduroning o‘g‘li, shuningdek, davlat rahbarlarining o‘g‘irlab ketilishiga ko‘nikish hech bir davlat xavfsiz emasligini anglatishini ta’kidladi. “Bugun Venesuela, ertaga esa bo‘ysunishni rad etgan istalgan mamlakat bo‘lishi mumkin”, — dedi u.

Avvalroq Xitoy Tashqi ishlar vazirligi rasmiy vakili Mao Nin AQShni Nikolas Maduro va uning rafiqasi Silia Floresning qo‘lga olinishi orqali xalqaro munosabatlar barqarorligini buzishda ayblagan edi. Uning ta’kidlashicha, hech bir davlat xalqaro huquqdan ustun bo‘lgan o‘z qoidalarini o‘rnatishga haqli emas. Diplomat Xitoy Maduro va uning turmush o‘rtog‘ini zudlik bilan ozod etishga chaqirishini ham qayd etgan.

• AQSh
• Siyosat
• Venesuela