Maktab bitiruvchilari “Bo‘lajak yosh muhandislar” fan olimpiadasida ishtirok etib, Damas yutib olishlari mumkin. Bu haqda maktabgacha va maktab ta’limi vaziri Hilola Umarova ma’lum qildi.

Uning bildirishicha, aprel oyida Toshkent to‘qimachilik va yengil sanoat instituti tomonidan “Bo‘lajak yosh muhandislar” fan olimpiadasi o‘tkaziladi. Ushbu olimpiadada faqat 11-sinf o‘quvchilari ishtirok etishi va o‘quvchilar fizika, matematika hamda kimyo fanlaridan bilimini sinab ko‘rishi mumkin.

G‘oliblar quyidagicha taqdirlanadi:

1-o‘rin — Damas avtomobili (3 dona);

2-o‘rin — 20 million so‘m (3 nafar o‘quvchiga);

3-o‘rin — 10 million so‘m (3 nafar o‘quvchiga).

“Aytish mumkinki, bu kabi loyihalar ham o‘quvchilarimizning o‘z ustida yanada ishlashi va bilimga qiziqishini oshiradi”, – deydi maktabgacha va maktab ta’limi vaziri.

Prezident farmoni bilan 2025-yildan “El-yurt umidi” jamg‘armasining yangi stipendiya yo‘nalishi sifatida “Yorqin iste’dod” loyihasi joriy etiladi.  Jamg‘armaga joriy yilda “Yorqin iste’dod” loyihasi uchun 300 milliard so‘m ajratiladi. Shuningdek, nufuzli xalqaro fan olimpiadalari g‘olib va sovrindorlariga to‘lanadigan bir martalik pul mukofotining amaldagi miqdorlari 5 baravarga oshiriladi.

• Avtomobil
• Mukofot
• Olimpiada
• Oliy ta'lim, fan va innovatsiyalar vazirligi