5 yildan beri xalqaro qidiruvda bo‘lgan 34 yoshli ayol O‘zbekiston Ichki ishlar vazirligi Tezkor-qidiruv departamenti hamda Turkiyaning Istanbul shahridagi Bosh konsulxonasi hamkorligidagi qidiruv tadbirlari natijasida qo‘lga olindi va Turkiyadan O‘zbekistonga ekstraditsiya qilindi.

Tergov hujjatlariga ko‘ra, ushbu ayol yuqori maosh va’dasi bilan qizlarni aldab Turkiyaga olib borgan, u yerda esa ularning fuqarolik pasportlarini tortib olib, fohishalik bilan shug‘ullanishga majburlagan.

1991-yilda tug‘ilgan ushbu shaxsga nisbatan O‘zbekiston Respublikasi Jinoyat kodeksining 135-moddasi 2-qismi bilan jinoyat ishi qo‘zg‘atilib, qidiruv e’lon qilingan, olib borilgan tezkor choralar natijasida uning Istanbul shahrida yashirinib yurganligi aniqlangan.

Mazkur shaxs Turkiya hududida qo‘lga olinib, joriy yilning 18-noyabr kuni belgilangan tartibda O‘zbekistonga ekstraditsiya qilindi.

Amaldagi qonunchilikka muvofiq, bunday jinoyat uchun 5 yildan 15 yilgacha ozodlikdan mahrum qilish jazosi belgilangan.

• Jinoyat
• Odam savdosi
• O‘zbekiston
• Turkiya