Xitoylik planetologlar “Chjunjun” marsoxodi Mars sayyorasida taxminan 3,5 milliard yil oldin ulkan okean bo‘lganini tasdiqlovchi asosli dalillar topgani haqida xabar berdi.

Marsoxod sayyoradagi “Utopiya” tekisliklariga 2021-yilda qo‘ngan va keyingi yilning mayidan boshlab ishga tushgandi. Qurilma Marsdagi qish mavsumida gibernatsiya rejimiga o‘tgandi. Yangi mavsum boshlanishi bilan marsoxod kutilmaganda ishlamay qoldi.

Muhandislar qurilmaning quyosh panellari qum bilan qoplangani va bu ularning quvvatlanishiga xalaqit bergan bo‘lishi mumkinligini taxmin qilmoqda. Tadqiqotchilar marsoxodning bir yillik faoliyati davomida olingan ma’lumotlarni o‘rganishda davom etmoqda. Ma’lumotlar tahlili qariyb 3,5 milliard yil oldin Marsning shimoliy yarimsharini katta qismi ulkan dengiz bilan qoplanganini taxmin qilish imkonini bermoqda.

Tadqiqotchilar marsoxod qo‘ngan “Utopiya” tekisligi yuzasini o‘rganish asosida shunday xulosaga kelgan. Xususan, tadqiqotchilar chuqursimon konuslarga duch kelgan, ular loy vulqonlari natijasida shakllangan bo‘lishi mumkin. Bu sayyora yuzasidan suv bo‘lganini bildiradi.

Bundan tashqari, marsoxod cho‘kindilarga xos bo‘lgan qatlamli tuzilmalarni ham topgan.Olimlar Marsning qadimiy okeani tarixini taxminan qayta tiklab ko‘rdi. Ularning baholashicha, “Utopiya” tekisliklari 3,68 milliard yil oldin suv ostida bo‘lgan. Oxirgi 230 million yilda okean yuzasi sekin-asta muzlagan va suvlar qurib ketgan.

• Lifestyle
• Mars
• Okean
• Xitoy
• topilma