AQShning sobiq prezidenti Donald Trampning rafiqasi Melaniya Tramp oʻz koʻzlari aks etgan NFT-tokenni sotuvga qoʻydi. Milliarder bunday yangilik bilan rafiqasini tabriklagan.

“Melaniyaning yangi NFT-token biznesini yoʻlga qoʻyishi amerikaliklarning ixtirochilik, kreativlik va tadbirkorlik ruhini ifoda etadi”, dedi Donald Tramp bu haqida.

Loyihadagi ilk token uchun Melaniya Trampning koʻzlari aks etgan raqamli akvarel tanlab olingan. Ushbu NFT-tokenning narxi bir SOL (“Solana” blokcheyn platformasining ichki kriptovalyutasi) va hozirgi kurs boʻyicha 172 AQSh dollarini tashkil qilmoqda.

Melaniya Tramp kelgusida ham yangi NFT-tokenlarni taqdim etishga vaʼda bergan. Ulardan tushgan daromad esa bolalar uylari tarbiyalanuvchilariga yetkazib berilishi maʼlum qilingan.

NFT-token – blokcheynda saqlanuvchi noyob raqamli sertifikat boʻlib, suratlar, video, audio, tvitlar va boshqa turdagi raqamli mahsulotlarga egalik huquqini beradi.

• mashhurlar
• qiziqarli