Portugaliyalik futbol yulduzi Krishtianu Ronaldu bo‘lajak turmush o‘rtog‘i Jorjina Rodriges bilan bo‘ladigan to‘yiga uzoq yillik raqibi Lionel Messini ham taklif qilgani aytilmoqda. Bu haqda jurnalist Esegbona Luis ma’lum qilgan.

Manbaga ko‘ra, tantanali marosimga Braziliya terma jamoasi hujumchisi Neymar hamda Ronalduning yaqin do‘sti, UFC’ning sobiq chempioni Xabib Nurmagomedov ham taklif etilgan.

“The Sun” nashri xabariga ko‘ra, to‘y joriy yilning 8-avgust kuni Portugaliyaning Madeyra orolida bo‘lib o‘tadi. Nikoh marosimi Funshal soborida o‘tkazilishi, undan so‘ng esa mehmonlar besh yulduzli mehmonxonada tashkil etiladigan tantanali qabul marosimida ishtirok etishi rejalashtirilgan.

Shuningdek, tadbir munosabati bilan mehmonxonaning ikki qavati va bir nechta bar hududlari ikki kun davomida faqat to‘y mehmonlari ixtiyoriga berilishi aytilmoqda.

Ma’lumot uchun, Krishtianu Ronaldu va Jorjina Rodriges 2016-yildan buyon birga yashab kelmoqda. Ular besh nafar farzand — Krishtianu Junior, Yeva, Mateo, Alana Martina va Bella Esmeraldani tarbiyalab kelmoqda. Juftlik 2025-yil avgust oyida munosabatlarini rasman fotiha bilan mustahkamlagani ma’lum qilingan.