“Dunyodagi eng xunuk it” internet yulduziga aylandi

Xitoyda Huahua laqabli it o‘zining noodatiy tashqi ko‘rinishi sabab ijtimoiy tarmoqlarda mashhurlikka erishdi. Mahalliy OAVlarga ko‘ra, uning ishtirokidagi qisqa videolar atigi bir hafta ichida millionlab tomosha yig‘gan.

Foydalanuvchilar Huahuani “xunuk jozibadorligi” uchun maqtab, uni hazil tariqasida “go‘zallik tanlovida oxiridan birinchi o‘rinni olgan it” deb atashmoqda.

Ma’lum bo‘lishicha, Huahuaning ota-onasi zotdor border-kolli itlari bo‘lib, uyadagi boshqa kuchuklar standart ko‘rinishda tug‘ilgan. Huahua esa kam uchraydigan genetik mutatsiya tufayli o‘zgacha qiyofaga ega: uning juni tartibsiz o‘sgan, quloqlarida esa ikki tutam patga o‘xshash uzun junlari bor.

Nostandart ko‘rinishi sabab uni uzoq vaqt sotishning imkoni bo‘lmagan. Biroq videosi internetda tarqalib ketgach, Huahua qisqa fursatda mashhur bo‘ldi va 3-avgust kuni yangi egasi tomonidan 2400 yuan (taxminan 4,3 mln so‘m) evaziga sotib olindi.

Avvalroq Keniyadagi Masai Mara milliy qo‘riqxonasida suratga olingan jingalak yolli noyob sherning fotosurati ham internetda millionlab foydalanuvchilarning e’tiborini tortgandi.