“Manchester Siti” va O‘zbekiston milliy terma jamoasi himoyachisi Abduqodir Husanovning agenti G‘ayrat Hasbiullin futbolchining Yevropaga yo‘li qanday boshlanganini ma’lum qildi. Uning so‘zlariga ko‘ra, Fransiyaning “Lans” klubi Husanovni 2023 yili Argentinada o‘tgan U-20 Jahon chempionatida kashf etgan.

Klub skauti dastlab boshqa futbolchini kuzatish uchun kelgan bo‘lsa-da, O‘zbekistonga qarshi o‘yinda Husanovning harakatlari e’tiborini tortgan. Ikkinchi uchrashuvni ham tomosha qilgan skaut hisobot tayyorlagan va bosh murabbiy futbolchini jamoaga olib kelishni so‘ragan. Hasbiullinning aytishicha, shundan so‘ng “Lans” bilan muzokaralar tez boshlangan. Klub rahbariyati Husanovni jamoaning asosiy himoyachilaridan biri sifatida ko‘rayotganini bildirgan. Agent, shuningdek, Husanovning Belarusga yo‘l olishi ham tasodifiy bo‘lmaganini ta’kidladi. U yerda yosh iste’dodlarni rivojlantirish bo‘yicha tajribali murabbiy Anatoliy Yurevich bilan ishlash futbolchining o‘sishida muhim rol o‘ynagan.

Hasbiullinning ma’lum qilishicha, Husanovga Rossiyaning “Sochi” va “Alaniya” klublari ham qiziqish bildirgan. Biroq futbolchining asosiy maqsadi boshidanoq Yevropa futbolida to‘p surish bo‘lgan. Eslatib o‘tamiz, Abduqodir Husanov 2025 yilning qishida Fransiyaning “Lans” klubidan 40 million yevro evaziga Angliyaning “Manchester Siti” jamoasiga transfer qilingan va klub bilan 2029 yil yozigacha mo‘ljallangan shartnoma imzolagan.